DILI, 16 dezembru 2023 (TATOLI)—Primeiru-Ministru (PM), Kay Rala Xanana Gusmão, hamutuk ho delegasaun sábadu ne’e, hasoru malu ho Primeiru-Ministru Japaun, Fumio Kishida, hodi ko’alia kona-ba kooperasaun.
“Japaun sei apoia Timor-Leste iha área rekursu umanu ne’ebé kompetente sei loke luan liután oportunidade atu Timor-Leste sai membru ASEAN,” Fumio Kishida, hateten, durante enkontru, iha edifísiu servisu Nagata-cho, Choyoda-ku, Tokyo.
Biban ne’e, Primeiru-Ministru Fumio Kishida hato’o apresiasaun ba partisipasaun ninia omólogu, Xanana Gusmão, iha simeira Asosiasaun Nasaun Sudeste Aziátiku (ASEAN, sigla inglés) (ASEAN)-Japaun ba dala-50, ne’ebé atu hametin vizaun no relasaun ‘Heart to Heart’ (Husi Fuan ba Fuan) entre ASEAN-Japaun hodi hamosu deklarasaun konjunta, ho vizaun foun ida ba futuru ida ho ninia planu implementasaun ne’ebé sei inklui mós kooperasaun konkreta iha área oin-oin.
“Benvindu Primeiru-Ministru Xanana mai iha simeira ASEAN-Japaun ba 50, agradese tebes ba ita-nia partisiapasaun bele hametin liután ita-nia lasu amizade. Japaun sei apoia Timor-Leste sai membru ASEAN,” nia dehan.
Notísia relevante : PM Xanana desloka ohin bá Japaun partisipa simeira ASEAN – Japaun
Japaun nu’udar parseiru estratéjiku ba dezenvolvimentu ASEAN, kontinua apoia área importante hotu hodi lori nasaun Timor-Leste sai nu’udar membru plenu permanente, ne’ebé nu’udar oportunidade osan-mean durante tinan balun nia laran hatudu interese boot atu sai membru ASEAN.
Iha fatin hanesan, Primeiru-Ministru Xanana, agradese ba apoia hosi Estadu Japaun ba Timor-Leste ninia prosesu kontrusaun Estadu no infraestrutura inklui apoia sai membru plenu iha tinan 2025.
“Ha’u agradese konvite hodi mai partisipa iha simeira. Aleinde ne’e, oportunidade ida hametin kooperasaun entre nasaun rua no nasaun ASEAN sira,” PM Xanana, apresia.
Nia konsidera, simeira ne’e bele fó oportunidade ba Timor-Leste hodi troka hanoin no aprende lisaun matenek hosi ASEAN, ba ninia apoiu forte adezaun ba asosiasaun no ninia empeñu atu ajuda Timor-Leste implementa roteiru ba adezaun ba asosiasaun rejionál ne’e.
“Japaun hanesan primeira nasaun ne’ebé dezde tinan 2000 ajuda Timor-leste liuhosi JICA ne’ebé apoia ami-nia prosesu kontrusaun Estadu no ami apresia tebes ba apoia ne’e,” Xanana tenik.
Xanana sente previleju tebes, tanba Timor-Leste hetan estatutu espesiál hosi ASEAN nu’udar observadór ne’ebé geografikamente tama iha Rejiaun Sudeste Aziátiku, ne’ebé presiza kria no habelar kooperasaun bilaterál, multilaterál, trilaterál ho país membru asosiasaun.
Vizita ne’e termina ho entrega prenda ba malu entre Xefe Governu rua hodi hametin liután kooperasaun entre rai rua ne’ebé la’o dadaun.
Jornalista : Antónia Gusmão
Editora : Julia Chatarina
