DILI, 16 dezembru 2023 (TATOLI)—Primeiru-Ministru (PM), Kay Rala Xanana Gusmão, hamutuk ho delegasaun, iha sesta (15/12), hasoru malu ho estudante timor-oan iha Japaun ne’ebé halibur malu iha Asosiasaun Estudante Timor-oan iha Japaun(AETJ), iha Otél The Okura Tokyo-Japaun.
Xefe Governu motiva estudante sira hodi uza oportunidade no tempu hodi estuda nune’e bele kontribui ba dezenvolvimentu nasaun.
“Aproveita oportunidade sira ne’e, tulun malu hakbesik malu, tanba liuhosi atividade sira hanesan ne’e, hatene katak imi iha difikuldade maibé ida-ne’e la sai obstákulu ba imi-nia estudu iha ema-nia rain, hatudu imi-nia prestasaun iha atividade tantu iha eskola, nune’e bainhira imi ramata eskola, imi filafali bele kontribui matenek ba ita-nia rain,” PM Xanana, hateten, hanesan fó sai hosi nota ne’ebé Agência Tatoli asesu, sábadu ne’e.
Xefe Governu mós husu ba estudante sira hodi nafatin hatudu disiplina, badinas no matenek hodi kumpre regra hotu ne’ebé universidade Japaun sira estebelese, nune’e bele termina estudu ho susesu.
Notísia relevante : Empreza INPEX Japaun interese investe iha Timor-Leste
Hafoin dada-lia ho estudante sira, Xefe Ezekutivu agradese tebes ba inisiativa harii asosiasaun estudante, ne’ebé bele tulun malu iha ema-nia rain no husu atu hatudu identidade valór kultura Timor ba ema seluk.
Iha biban hanesan, Prezidente AETJ, Geovania Garret Mouzinho Freitas, husu Governu nia apoiu hodi fasilita asosiasaun hala’o atividade ne’ebé durante ne’e hala’o hela hanesan promove kultura, kria plataforma ba estudante sira halo konetividade relasaun entre estudante ho akadémiku inklui atividade prisinsipál sira seluk.
“Hakarak hato’o agradese wain ba Primeiru-Ministru, tanba maski okupadu tebes, sei fó nia tempu hasoru estudante sira. Obrigada barak bele ajuda ona ami atu realiza programa tuir mai, espera katak programa sira ne’e la’ós atu halo kontente-an de’it, maibé atu ajuda mós hametin liután amizade ne’ebé iha ona, halo ami bele besik malu liután atubele suporta malu, tanba buat ne’ebé halo ha’u kontente tebes maka bele hola parte iha asosiasaun ho estudante sira seluk, ne’ebé halo ami toman malu no sempre ajuda malu,” Geovania dehan.
Estudante timor-oan hamutuk 42 hanesan bolseiru hosi Governu Timor-Leste no bolseiru hosi JICA – Ministry of Education, Culture, Sports, Science and Technology (Mext) maka daudaun ne’e halibur malu iha AETJ.
To’o oras ne’e bolseiru balun ramata ona estudu no fila ona bá Timor, enkuantu seluk kontinua estudu iha universidade sira iha japaun.
Misaun asosiasaun estudante ne’e maka atu sai hanesan plataforma ne’ebé fó asisténsia másimu ba estudante timor-oan sira iha japaun atubele susesu iha sira-nia estudu no bele liu dezafiu ne’ebé sira hasoru durante hala’o estudu inklui promove Timor-Leste ba komununidade japonez no internationál.
Aleinde ne’e, AETJ iha vizaun atu kuda ambiente ne’ebé bele ajuda estudante timor-oan sira hodi hametin no haklean matenek ne’ebé hetan iha nível akadémiku no sosiál hodi bele transmite no kontribui matenek ba dezenvolvimentu futuru Timor-Leste.
Nune’e mós, Embaixadór Timor-Leste iha Japaun, Ilídio da Costa Ximenes, hateten, durante ne’e estudante sira koopera tebes ho Reprezentante Estadu Timor-Leste iha Japaun.
“Agradese tebes ba enkontru ne’e no informa katak durante ne’e estudante sira ativu tebes koopera ho Embaixada Timor-Leste iha Japaun no sempre partisipa iha atividade importante sira ne’ebé Embaixada hala’o ho povu japonez hodi promove turizmu no kultura Timor-Leste,” nia tenik.
Enkontru ne’e akompaña mós hosi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, no Vise-Ministra ba Asuntu ASEAN, Milena Maria da Costa Rangel.
Jornalista : Antónia Gusmão
Editora : Julia Chatarina
