BOBONARO, 18 dezembru 2023 (TATOLI) – Ministru Agrikultura, Peska, Pekuária no Floresta (MAPPF), Marcos da Cruz, fó-sai katak, Konsellu Administrasaun Fundu Infraestrutura (CAFI, sigla portugés), aprova ona dezeñu konstrusaun ba irrigasaun Maliana II, tanba ne’e projetu refere serteza implementa iha tinan 2024 hodi distruibui bee ba agrikultór sira-nia natar.
Notísia relevante: ADN aprova ona projetu irrigasaun Maliana II
“Ha’u aprezenta iha CAFI aprova tiha ona, ohin moos Ministru Planeamentu Investimentu Estratéjiku sei aprezenta liután iha Parlamentu Nasionál, ne’ebé Maliana II ne’e nia serteza tinan oin ne’e ita sei halo,” nia informa ba jornalista sira iha Eskola Téknika Agrikola, Moleana, suku Ritabou, segunda ne’e.
Nia dehan, iha tempu badak Komisaun Nasionál Aprovizionamentu (CNA, sigla portugés) sei halo prosesu kona-bá konkursu públiku, kuandu kompañia manán tiha, ekipa tékniku sei halo konstrusaun, karik tinan ida rua hanesan área sira hosi Tunubibi sa’e mai ne’e abandona ne’e funsiona hotu.
Ministru Marcos ko’alia ona ho Embaixadór Indonézia iha Timor Leste, atu halo kooperasaun servisu, tanba dezeñu konstrusaun ba irrigasaun Maliana II ne’e iha portaun rua, ida fahe bee parte mai Timor-Leste área suku Tapo-Memo, Holsa, Saburai no ida fahe ba parte área Builalu, Turiskain, Haikesak, Indonezia nian.
Governante ne’e fundamenta, irrigasaun Maliana II ne’e sei fornese bee kobre natar sira iha área Urbana ho totál ektare 1,500.
Enkuantu totál orsamentu ne’e ne’ebé MAPPF prevee iha dezenu Biil Off Quantitative BOQ ba konstrusaun irrigasaun Maliana II hamutuk millaun $11.
Notísia relevante: Xefe suku Tapo-Memo: “Komunidade fa’an rai tanba irrigasaun Maliana II la funsiona”
Jornalista: Sérgio da Cruz
Editór: Evaristo Soares Martins
