iklan

NASIONÁL, HEADLINE, KAPITÁL

EDTL sei halo limpeza ba ai-horis ne’ebé afeta fiu eletrisidade

EDTL sei halo limpeza ba ai-horis ne’ebé afeta fiu eletrisidade

Logotipu EDTL. Imajen/Espesiál

DILI, 18 dezembru 2023 (TATOLI)Sekretáriu Estadu Eletrisidade, Água no Saneamentu, Santos Noronha, hateten, daudaun ne’e ekipa sira hosi Eletrisidade Timor-Leste, Empreza Públika (EDTL, E.P) no Autoridade Protesaun Sivil (APC, sigla portugés) tesi ai sira iha sidade Dili ne’ebé afeta ba fiu eletrisidade.

“Atividade ida-ne’e hanesan parte ida hosi Sekretaria Estadu nia planu atu evita ai tohar kona fiu sira hodi halo ahi eletrisidade sempre mate beibeik, ida-ne’e kauza ida hosi ai sira ne’e tohar,” Santos Noronha, informa, ba Agência Tatoli, iha Parlamentu Nasionál, segunda ne’e.

Nia dehan, sistema eletrifikasaun daudaun sei manuál tebes, ne’ebé dalaruma ai-hun ka ai-sanak ruma monu kona, bele afeta maka’as tebes.

“Entaun ha’u deside ami identifika ai sira iha Dili laran ne’ebé afeta ba fiu eletrisidade tenke tesi, la’ós de’it sira iha estrada públiku maibé identifika iha komunidade nia uma mak ami sei halo limpeza,” governante ne’e akresenta.

Notísia relevante : EDTL, E.P sei tesi kotu fiu hosi operadór telekomunikasaun ne’ebé dezorganizadu

Tékniku sira ne’ebé halo limpeza sei fahe ba ekipa rua, ekipa ida limpeza no seluk halo identifikasaun.

“Ami serbisu hamutuk ho Autoridade Protesaun Sivil, sira mós fó ekipa ida hamutuk ho EDTL hodi halo limpeza. Identifikasaun ne’e aleinde simu pedidu ruma hosi populasaun, ekipa bele ba, ida-ne’e gratuita,” nia subliña.

Enkuantu, kada fim semana ekipa EDTL no APC sempre tesi ai sira iha Dili laran. Área ne’ebé sira tesi mak iha Taibesi, no Colmera.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!