DILI, 18 dezembru 2023 (TATOLI)—Primeiru-Ministru (PM) Japaun, Kishida Fumio, fó orientasaun ba empreza Tsuneishi Shipbuilding C. Ltd hosi Japaun, hosi bele harii ona estaleiru ba ró, iha Timor-Leste, iha tinan 2024.
“Ami-nia empreza shipping halo ona estudu iha Timor-Leste, no ba fatin ida ne’ebé planu atu harii estaleiru, ho Vizita Primeiru-Ministru Xanana Gusmão nian tinan oin bele hahú ona obra ne’e,” Kishida Fumio, hateten, liuhosi nota ne’ebé Agência Tatoli asesu, segunda ne’e.
Prezidente empreza Tsuneishi Shipbuilding C. Ltd, Sachio Okumura, agradese tebes ba PM Xanana tanba bele vizita ona sira-nia fatin hodi haree direta sentru fábrika ró empreza Shipping Building iha área Hiroshima, Tokyo, Japaun.
Nia haktuir, antes ne’e ekipa téknika hosi empreza hala’o ona peskiza ida iha Timor-Leste, no nota Timor-Leste sai nu’udar fatin potensiál atu harii estaleiru, ho medida rai kilómetru kuadradu 970, ne’ebé lokaliza iha postu administrativu Laleia, munisípiu Manatuto.
“Agradese ba Primeiru-Ministru Xanana disponível enkontru ho ami hodi atualiza no informa katak antes ekipa survey uluk ona fatin balun ne’ebé atu investe iha Timor-Leste,” Sachio Okumura, tenik.
Notísia relevante : Empreza Tsuneishi-PM Xanana diskute planu instalasaun estaleiru iha Manatuto
Tuir estimasaun bainhira investimentu ne’e harii sei oferese postu traballu mínimu 4.000 ba timor-oan no sei prodús ró (vessel) hamutuk 10-12 kada tinan no sei harii eskola, ótel no ospitál.
Iha fatin hanesan, Primeiru-Ministru, Kay Rala Xanana Gusmão, agradese no promete katak Governu sei fasilita kondisaun hotu hodi fasilita empreza Tsuneishi Shipbuilding C. Ltd bele harii ona indústria shipyard iha Timor-Leste.
“Governu konsidera ho indústria shipyard nia prezensa bele kapasita timor-oan sira inklui kria postu serbisu,” nia tenik.
Jornalista : Antónia Gusmão
Editora : Julia Chatarina
