DILI, 18 dezembru 2023 (TATOLI)—Ministériu Agrikultura Pekuária Peska no Floresta (MAPPF) liuhosi Diresaun Nasionál Agrikultura no Ortikultura, tinan ne’e, fahe tan fini batar no hare kulit ba komunidade iha territóriu laran hamutuk tonelada 260, ho kustu orsamentu $650.000.
“Ita sei fahe hare kulit tonelada 140 ho kustu $350.000 no batar tonelada 120 ho kustu 300.000,” Diretór Nasionál Agrikultura no Ortikultura, Lucio Ribeiro, informa ba Agência Tatoli, iha ninia knaar fatin, edifísiu MAPPF, Comoro, segunda ne’e.
Antes ne’e, iha tinan 2022 distribui ona fini batar no hare kulit tonelada 300, ne’ebé batar tonelada 140 no hare kulit tonelada 160 maibé kolleta hotu ona iha tinan 2023.
Notísia relevante : Servisu Agrikultura Viqueque hahú distribui fini batar ba agrikultór
Fini tonelada 260 ne’ebé distribui iha tinan ne’e prepara ba époka dahuluk 2023 no 2024 tanba sei kuda iha fulan outubru-novembru 2023 no sei kolleta iha inísiu 2024 nian. Marsu ne’e hanesan époka dahuluk kolleta ona.
“Liu ida-ne’e ita prepara fali ba époka daruak nian, ne’ebé prepara fali dentru fulan abríl, maiu, no juñu ita sei kolleta iha jullu lae agostu 2023, tanba ita koñese époka ne’e rua, époka udan-ben no bailoro,” nia akresenta.
Fini ne’ebé distribui ne’e mai hosi fini sertifikadu, katak MAPPF kontratu ho Asosiasaun Nasionál Produtór Fini Komersiál Timor-Leste (ANAPROFIKO-TL) nu’udar mahon ba asosiasaun sira no liuhosi sira mak loke konkursu públiku ba asosiasaun sira ne’ebé manán hodi kuda fini komersiál no hosi ne’e mak MAPPF sosa hodi distribui fali ba agrikultór sira.
“Fini ne’ebé ita distribui ba komunidade ne’e gratuita, bainhira kolleta ita la foti, tanba objetivu mak hakarak hasa’e produsaun rai-laran,” nia tenik.
Jornalista : Arminda Fonseca
Editora : Julia Chatarina
