DILI, 19 dezembru 2023 (TATOLI)–Hermínia da Costa sai vensedora iha Kompetisaun Negósiu Inovativu (KNI), iha área karpentaria (halo kadeira hosi ai-teka), ne’ebé realiza hosi Sentru Nasionál Empregu no Formasaun Profisionál (CNEFP, sigla portugés) Tibar, no Ministériu Komérsiu no Indústria (MKI).
Herminia da Costa ho ninia empreza Savio Gracefull Furniture hosi munisípiu Baucau simu osan hamutuk $14.000 ho ekipamentu karpentaria. Enkuantu, Jacinto Vicente Afonso nu’udar vensedór daruak (halo kadeira ho funsaun tolu, kadeira bele tur, toba inklui gaveta), mai hosi empreza Hawliko Kaum Muka hosi munisípiu Bobonaro no simu osan hamutuk $10.500 inklui ekipamentu karpentaria, no vensedór datoluk mak, Leonardo dos Santos (halo kadeira ho nia funsaun rua bele tur bele mós toba), hosi empreza Karpintaria Pun-Put hosi munisípiu Ermera no simu osan $7.000 no ekipamentu karpentaria.
Manán na’in-tolu ne’e aleinde simu prémiu osan ho ekipamentu karpentaria simu mós sretifikadu apresiasaun. Partisipante sira seluk ne’ebé kompete maski la liu mós simu sertifikadu.
Prémiu sira ne’e entrega hosi Ministru Komersiu no Indústria, Filipus Nino Pereira, akompaña hosi Diretór Sentru Nasionál Empregu no Formasaun Profisionál, José Simão Tito Barreto, iha CNEFP Tibar, tersa ne’e.
Notísia relevante : Kompetisaun Planu Negósiu Inovativu 2023 área pekuária termina iha outubru
Ministru Nino Pereira, hateten, kompetisaun ne’e ho intensaun atu motiva joven profisionál sira atu investe iha setór produtivu komérsiu no indústria ne’ebé orienta ba impaktu sosiál no fó valór a’as ba ekonomia rai-laran hodi kontribui rezolve problema komunidade.
“Governu rekoñese katak kompetisaun ne’e hanesan meiu ka oportunidade di’ak ba foin-sa’e sira. Ida-ne’e hanesan dalan para ita atu haluan tan ita-ninia koñesimentu hodi investe di’ak liután esperiénsia hotu ne’ebé hetan durante prosesu kompetisaun, liuhosi kompetisaun ne’e mós atu hakbiit di’ak liután koñesimentu hodi halo jestaun ba negósiu ne’ebé kria ona,” governante ne’e haktuir.
Ministru akresenta, Governu iha dever atu promove ideia inovativu foin-sa’e nian. Aleinde ne’e muda mentalidade no hanoin hodi haree ba realidade nasaun nian. Investimentu ida-ne’ebé mak Estadu ida-ne’e halo ba foin-sa’e sira tuir polítika juventude katak Estadu tenke investe para joven sira iha vida saudável, kreatividade no hanoin inovativu.
“Tanba dezenvolvimentu nasaun ida nian ita presiza rekursu umanu ne’ebé di’ak, entaun ita boot sira (joven foin-sa’e) rekursu umanu ne’ebé mak iha skill. Ezemplu nu’udar karpenteiru ne’ebé halo buat barak ne’ebé ninia benefísiu boot tebes,” nia louva.
Iha fatin hanesan, Diretór Diretór Sentru Nasionál Empregu no Formasaun Profisionál, José Simão Tito Barreto, agradese ba MKI tanba envolve formadór no formadu CNEFP balun hodi partisipa durante prosesu, liu-liu halo lavantamentu ba iha grupu karpenteiru iha munisípiu hotu molok hetan konvite hodi partisipa iha kompetisaun refere.
“Kompetisaun ne’e sinál di’ak ida hodi hatudu mós ba formadu sira tanba sira ne’ebé kria ona ideia inovativu inspira joven sira kada tinan partisipa iha formasaun profisionál iha sentru Tibar,” nia tenik.
Entretantu, programa KNI ne’e realiza iha loron 24 fevereiru 2023, ne’ebé lansa hosi VIII Governu, ninia prosesu mak ekipa sira vizita uluk munisípiu 11 hodi rekolla elementu aplikasaun elijível, depois verifika elementu sira hanesan formatu aplikasaun, setifikadu rejistu komersiál, evidénsia serbisu ka produsaun.
Jornalista : Antónia Gusmão
Editora : Julia Chatarina
