DILI, 19 dezembru 2023 (TATOLI)—Ajénsia Promosaun Investimentu no Esportasaun, Institutu Públiku (TradeInvest Timor-Leste), iha segunda (18/12), fasilita empreza Tsuneishi Shipbuilding C. Ltd hosi Japaun hodi halo verifikasaun ba utilizasaun rai Estadu ne’ebé lokaliza iha postu administrativu Laleia, munisípiu Manatuto.
Ekipa hosi vizita konjunta refere, kompostu hosi TradeInvest Timor-Leste, Eletricidade de Timor-Leste, Empreza Públika (EDTL, E.P) no Terra no Propriedade munisípiu Manatuto ne’ebé akompaña hosi ekipa Asian Development Bank (ADB) hodi konfirma kona-ba utilizasaun rai Estadu entre projetu Enerjia Renovável ho indústria estaleiru hosi Empreza Tsuneishi Shipbuilding C. Ltd.
“Rezultadu hosi vizita konjunta ne’e, parte Terra Propriedade munisípiu Manatuto ho EDTL sei haree filafali ba akordu arrendamentu rai Estadu ne’ebé atribui ona ba EDTL,” regere nota ne’ebé Agência Tatoli asesu, tersa ne’e.
Notísia relevante : PM Japaun orienta empreza Shipping Building aselera harii estaleiru iha Manatuto
Antes ne’e, iha vizita Primeiru-Ministru, Kay Rala Xanana Gusmão iha Japaun, hala’o mós vizita ba empreza Tsuneishi Shipbuilding C. Ltd, ne’ebé lokaliza iha área Hiroshima Tókiu, Japaun.
Tuir estimasaun bainhira investimentu ne’e harii, sei oferese postu traballu mínimu 4.000 ba timor-oan, prodús ró (vessel) hamutuk 10-12 kada tinan inklui sei harii eskola, ótel no ospitál.
Jornalista : Antónia Gusmão
Editora : Julia Chatarina
