DILI, 20 dezembru 2023 (TATOLI)–Deputadu titulár Mari Bin Amude Alkatiri, kuarta ne’e, retoma mandatu nu’udar Deputadu hosi bankada opozisaun FRETILIN hodi marka prezensa partisipa iha debate no diskusaun ba votasaun iha espesialidade no votasaun finál globál proposta Orsamentu Jerál (OJE) 2024 ba loron ikus iha Parlamentu Nasionál (PN).
“Hanesan ohin, ha’u hato’o ona iha pedidu retoma mandatu Dr. Mari ne’ebé husu Sekretária atu halo favór lee,’’ Prezidente Parlamentu Nasionál, Maria Fernanda Lay, hateten, iha sala plenária, PN.
Sekretária Meza PN, Deputada Virgina Anabelo, lee sai karta hosi Prezidente Bankada FRETILIN, Aniceto Longuinhos Guterres Lopes, hodi dirije ba Prezidente PN, katak atu asegura regular ezersísiu mandatu Deputadu bankada parlamentár FRETILIN tuir termu alínea c, pontu 3 artigu 9 iha Rejimentu PN efetua retoma funsaun Deputadu iha PN ida-ne’e hahú iha loron 20 dezembru 2023, Deputadu titular Mari Bin Amude Alkatiri, iha nia funsaun ezerse substituisaun temporária hosi Deputadu Antonino Doutel Sarmento.
Notísia relevante : Mari Alkatiri husu Governu rezolve problema uma kain-hitu iha Becuse
Deputada PLP, Maria Angelina Sarmento, hato’o benvidu ba Deputadu Mari Alkatiri, nia prezensa.
Deputadu FRETILIN, Antonino Bianco, agradese ba fundadór nasaun ohin mai reprezenta povu hanesan Deputadu.
Jornalista : Nelson de Sousa
Editór : Cancio Ximenes
