DILI, 20 dezembru 2023 (TATOLI)—Xefe Departamentu Emerjénsia, Hospitál Nasionál Guido Valadares (HNGV), Eldegar Lopes Martins, relata, tempu udan pasiente sira kada loron nakonu iha sala emerjénsia hamutuk 300 resin hodi halo tratamentu saúde.
“Ha’u preokupa, ho situasaun daudaun ne’e, tanba tama ona ba tempu udan nune’e sala emerjénsia nakonu ho pasiente sira. Entaun ha’u fó mensajen ba komunidade, sira dahuluk iha fulan ida ne’e, númeru pasiente hahú aumenta fila fali, kada loron pasiente ne’e mais 300 ona. Agora daudaun tempu udan moras sira oin-oin hanesan diarea, dengue, Infesaun Sistema Respiratóriu Aguda (ISPA) no moras ne’e afeita ba labarik no ema boot,” xefe departamentu ne’e hatete ba Jornalista sira iha HNGV, ohin.
Ho espasu refere, nia husu ba komunidade hotu-hotu liuliu inan-aman sira no família tomak bainhira labarik sira moras karik sira ne’ebé ho kondisaun ho kategoria grave presiza lori mai emerjénsia, maibé sira ne’ebé ho kondisaun di’ak hela ba halo tratamentu saúde iha fasilidade saúde ne’ebé mak besik.
“Sira ne’ebé foin isin-manas, te’e-been maibé nia bele han, bele hemu, sebele lori ba sentru saúde no postu saúde atu médiku sira haree, karik presiza haruka mai, mak sira ne’ebé mai grave atu nune’e ita-nia espasu iha emerjénsia naton,” nia fó-hanoin.
Ezekutivu ne’e haktuir, dadus husi Departementu Emerjénsia hahú husi fulan novembru, pasiente ne’ebe tama iha sala emerjénsia hamutuk 5.253. Husi númeru ne’e, mai ho kategoria asidente karreta, motor, moras baibain, hetan taa husi ema deskoñesidu, no mós moras sira seluktan.
Pasiente ne’ebé tama ba iha internamentu iha fulan novembru, iha maternidade 600, medisina interna 326, sirurgia 129, pediatria 111, perinatologia 62, no interna iha psikatria na’in haat.
“Pasiente sira ne’ebe husu alta pedidu iha fulan outorbru no novembru ne’e hamutuk 60,” nia konklui.
Notísia relevante:Maiu-Emerjénsia HNGV rejista pasiente liu 3000
Jornalista : Felicidade Ximenes
Editór: Rafael Ximenes de A. Belo
