DILI, 27 dezembru 2023 (TATOLI) –Hahú husi inísiu fulan janeiru to’o 27 dezembru, Klínika Bairru-Pité (KBP) rejista kazu Tuberkuloze hamutuk 494 no mate iha ema na’in 11, José Maia Soares, Jestór Tuberkuloze (TB), relata.
“Ami rejista kazu Tb hamutuk 494 hahú husi inísiu fulan janeiru to’o 27 dezembru. Husi kazu 494 ne’e, mate iha na’in 11 inklui labarik idade tinan hitu; mate na’in neen,” jestór ne’e esplika, iha KBP, ohin.
Notísia relevante:Janeiru too maiu, KBP deteta moras tuberkuloze na’in-215
Nia esplika liután, husi kazu Tb 494, iha pasiente hamutuk 23 mak hetan tratamentu ho di’ak no sira seluk kontinua simu ai-moruk beibeik iha KBP.
“Pasiente tb sira tenke kumpre oráriu atu hemu ai-moruk ne’e beibeik durante fulan neen to’o fulan sia atu bele sai di’ak fali husi sira-nia moras, se lae bele hamosu mate. Tanba ne’e, Klínika Bairru-Pité prontu atu ajuda pasiente sira,” nia kompromete.
Tuberkuloze (Tb) mak moras ida-ne’ebé kauza husi moras ne’ebé habelar husi ema ba ema liuhusi anin. Tb baibain afeta pulmaun, maibé bele mós afeta parte seluk iha isin-lolon, hanesan kakutak, rins. No, ema ne’ebé moras Tb bele mate se bainhira sira la hetan tratamentu ho di’ak.
Notísia relevante:Administradora Fundu Globál konsidera kombate tuberkuloze presiza ema hotu nia kontribuisaun
Jornalista: Felicidade Ximenes
Editór: Rafael Ximenes de A. Belo
