BOBONARO, 28 dezembru 2023 (TATOLI) – Ai-moruk ne’ebé atu halo atendimentu ba kazu emerjénsia sira besik fulan-lima ona stoke out iha farmásia Sentru Saúde (SSK) postu administrativu Bobonaro vila, munisípiu Bobonaro.
Xefe sentru saúde postu Bobonaro, Domingos Mesquita da Silva, esplika, ai-moruk esensiál sira hanesan paraxetamól, amoxilin no antibiotika sira stoke sufisiente hela atu halo atendimentu ba pasiente sira-ne’ebé moras.
“Ita-nia ai-moruk emerjénsia hanesan plening tree, diclofenac, ne’e estoke limitadu tebes, ami iha-ne’e atende la hotu, ami tenke ser haruka ba Maliana, tanba iha-ne’e ai-moruk laiha,” nia ko’alia iha Maliana, tersa ne’e.
Nia hatutan, foin lalais ne’e responsável farmásia SSK Bobonaro haruka ona pedidu ba Servisu Saúde Munisipál Bobonaro, atu enkamiña ba Institutu Nasionál Farmásia Produtu Médiku (INFPM).
Durante ne’e SSK Bobonaro rejista kazu Infeksaun Respiratóriu Águda (IRA) aas liu ho totál pasiente na’in-2,128 no tuir kedas moras diarreia.
“Moras ne’e afeta ba labarik sira no ema boot, tanba ita haree kauza mai hosi ambiente, rai-rahun ne’e halo labarik sira moras,” nia katak.
Notísia relevante: Ai-moruk item rua stoke out iha saúde Bobonaro
Jornalista: Sérgio da Cruz
Editór: Evaristo Soares Martins
