iklan

EKONOMIA, HEADLINE, MUNISÍPIU, OÉ-CUSSE (RAEOA)

DRTT hapara ona rejista tum-tum foun tama iha Oé-Cusse

DRTT hapara ona rejista tum-tum foun tama iha Oé-Cusse

DRTT hapara ona rejista tum-tum iha Oe-Cusse. Imajen Tatoli/Abílio Elo Nini.

OÉ-CUSSE, 28 dezembru 2023 (TATOLI) – Departamentu Rejionál Transporte Terrestre (DRTT), Rejiaun Administrativa Espesiál Oé-Cusse Ambeno (RAEOA), daudaun ne’e hapara ona atu simu no rejista foun ba transporte tum-tum, tanba movimentasaun iha kapitál Oé-Cusse laiha espasu.

“Razaun primeiru tanba tum-tum iha Oé-Cusse barakliu ona, ita presiza hamenus, se lae movimentu iha vila laiha espasu, durante ne’e ita haree  bele akontese asidente barak, tan ne’e maka ita hapara atu simu tan rejistu foun,” Xefe Departamentu DRTT Oé-Cusse, Silvestre Sila Teme, iha Oé-Cusse, kinta ne’e.

Razaun segundu, sei DRTT autoriza nafatin tum-tum, afeta mós ba rendimentu, hanesan uluk rendimenu kada loron bele hetan dollar $20 kompara ho ikus-ikus ladún hetan tanba tum-tum barak ona, dollar $5 mós lá hetan iha loron ida nia laran.

“Entaun DRTT hakarak trava hodi prevene asidente, no labele afeta ba rendimentu sira, tanba ita haree sira la’o, barak mak seidauk hatene kódigu estrada,” nia afirma.

Notísia relevante: Janeiru-novembru 2023, DRTT Oé-Cusse rekolla reseita rihun $110-resin

Antes ne’e DRTT fó-sai ona aviza, taka iha fatin públiku sira, iha loron 06 fulan novembru 2023, aviza ne’e koordena mós ho Komandu PNTL Oé-Cusse, liuliu sesaun tránzitu.

“Ami mós hala’o ona sensibilizasaun ba xofer tum-tum sira, tanba dadus ne’ebé DRTT rejista iha ona tum-tum 300, maka daudaun ne’e hala’o hela movimentasaun iha Oé-Cusse vila, maibé barak seidauk iha koñesimetnu kona-bá sinál tránszitu nian.

Tán ne’e maka sensibilizasaun ne’e importante tanba antes ne’e parte DRTT no tránzitu sira rejista labarik minoridade barak maka sai motorista tum-tum, nune’e ameasa ba asidente públiku, tanba tuir lei tenke idade tenke liu tinan 17 ba leten.

“Enatun ita sosializa ba sira, ba oin ita sei aplika sansaun multa karik la kumpri, tanba sira-nia dokumentu transporte ne’e kada fulan neen tenke rejista fali iha DRTT,” nia informa.

Notísia relevante: DRTT no PNTL sensibiliza dekretu-lei kódigu estrada ba motorista Tum Tum Oé-Cusse

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!