OÉ-CUSSE, 28 dezembru 2023 (TATOLI) – Hahú hosi fulan janeiru to’o novembru 2023 ne’e, Departamentu Rejionál Transporte Terrestre (DRTT), Rejiaun Administrativa Espesiál Oé-Cusse Ambeno (RAEOA), rekolla reseita $110,826.50 ba kofre Estadu liuhosi tratamentu dokumentu ba transporte sira iha Oé-Cusse Ambeno.
Notísia relevante:DRTT no PNTL sensibiliza dekretu-lei kódigu estrada ba motorista Tum Tum Oé-Cusse
Xefe Departementu Transporte Terrestre Rejiaun Oé-Cusse Ambeno, Silvestre Sila Teme, informa, reseita ne’e kobre mai hosi tratamentu dokumentu transporte sira hanesan, karta kondusaun renova rejistu, rejistu foun no renova dokumentu inspesaun.
“Taxa ne’e ita rekolla seidauk inklui fulan-dezembru nian, tanba seidauk konta nia invoice, ne’ebé montante osan ne’e sei iha mudansa, kuandu fulan dezembru tama tán,” Silvestre Sila Teme, ba Agência Tatoli, iha Oé-Cusse, kinta ne’e.
Nia informa, iha trimestre dahuluk, janieru to’o marsu rekolla $28,265.00, no iha trimestre daruak hosi abríl to’o juñu rekolla hamutuk $$23,063, nune’e mós trimestre datolu, hosi fulan jullu to’o fulan setembru 2023 rekolla reseita hamutuk $33,496.00 ba kofre Estadu.
“Ita-nia atendimentu dokumentu durante ne’e DRTT iha kooperasaun di’ak ho Polísia Unidade Tranzitu Oé-Cusse, maibé kona-bá reseita infrasaun tránzitu la inklui iha reseita DRTT nian, sé bainhira sira kaptura motorista deteta dokumentu la tuir standar, sempre komunika mai iha ita, ne’ebé komunikasaun durante ne’e la’o di’ak,” nia katak.
Notísia relevante:DRTT Oé-Cusse prepara blanku no mákina prodús karta kondusaun orijinál iha 2024
Jornalista: Abílio Elo Nini
Editór: Evaristo Soares Martins
