DILI, 28 dezembru 2023 (TATOLI) – Eletrisidade De Timor-Leste, Empreza Públika (EDTL, E.P), iha janeiru to’o novembru ne’e, arrekada reseita millaun $53 ba kofre Estadu iha tinan 2023.
“Husi janeiru to’o mai iha fim de novembru, tanba dezembru ita seidauk halo rekonsiliasaun, to’o iha ne’e millaun $48.3. 2023 ne’e rasik ita projeta ba millaun $52, ida ne’e ita sei hetan ba tinan ne’e. Tanba kada fulan EDTL rekolla reseita liu millaun $4 ba kofre Estadu”, relata Prezidente Administrasaun EDTL, EP, Paulo da Silva, ba Tatoli iha Caicoli.
Reseita hirak ne’e, EDTL,E.P rekolla husi venda enerjia, reseita balun husi aluga poste EDTL, servisu ligasaun foun no multa ba ligasaun ilegál.
Iha tinan kotuk, EDTL arrekada de’it millaun $48. EDTL sai empresa Públika hosi 2021 to’o 2023 rekolla ona reseita ba kofre Estadu hamtuk millaun $130 ba kofre Estadu.
“Ita rejista besik kliente rihun 300 ba konta prepagu eletrisidade iha territóriu tomak. Hosi númeru 90% selu ona no restante seidauk tanba EDTL foin halo ligasaun ka monta kontador, ne’e sei gratuita durante fulan neen”, nia afirma.
Notísia Relevante: EDTL,E.P arrekada reseita millaun $38.4 ba kofre Estadu
Jornaslita: Jesuína Xavier
Editór : Florencio Miranda Ximenes
