Abitante Uatucarbau prefere Governu hadi’a merkadu

VIQUEQUE, 29 dezembru 2023 (TATOLI)-Abitante husi postu adiministrativu Uatucarbau, munisípiu Viqueque, prefere Governu atu hadi’a merkadu Uatucarbau hodi povu negosiante sira buka moris.

Reprezenta abitante postu Uatucarbau, Andre Fernandes, hateten, kondisaun uma merkadu Uatucarbau aat kuaze tinan barak ona, maibé seidauk hadi’a oinsá maka povu negosiante sira bele lori sira produtu hodi fa’an iha okos, buka sira-nia moris loron nian.

“Tanba ne’e, ami husu Governu liuliu Ministériu Komérsiu Indústria (MKI) tau atensaun ba merkadu Uatucarbau ne’ebé maka aat kuaze tinan barak ona, maibé seidauk atensaun husi parte relevante sira.  Ami hanoin presiza kria kondiasaun di’ak ba ita-nia povu atu sira bele buka moris. Se merkadu mak nune’e hela ita-nia povu lori sira-nia produtu bá fa’an iha okos mós sira tauk”, Andre Fernandes, hateten ba Agência Tatoli, iha postu administrativu Uatucarbau, sesta ne’e.

Andre Fernandes aprofunda, kondisaun merkadu di’ak maka foin negosiante sira bele fa’an sira sasán iha oras 24, maibé kondisaun agora aat sira fa’an sasán la hato’o oras sira fila tiha ona bá uma tanba kondisaun merkadu la seguru atu fa’an iha okos.

“Ita presiza mós haree kondisaun sira-ne’e ba ita-nia povu, hodi bele kria kondasaun, hodi bele promove produtu lokál no hadi’a ekonomia familiar nian,” nia hato’o.

Hatan ba preokupasaun ne’e, Diretór jerál husi MKI, Cosme Fátima Baptista da Silva, hateten, kondisaun merkadu iha postu Uatucarbau kondisaun aat no iha munisípiu seluk mós kondisaun ladun di’ak hotu MKI konsidera sai importante no sei tau atensaun.

“Ami haree kondisaun merkadu barak, maka agora kondisaun aat inklui mós merkadu Uatucarbau nian.  Tanba ne’e, ami sente katak asuntu merkadu ne’e sai importante ba MKI sei tau atensaun. Maibé, ita haree merkadu ne’ebé kustu ki’ik sei rezolve husi munisípiu, karik labele mak foin ministériu apoiu,” Cosme hato’o.

Tanba ne’e nia konsidera, merkadu sai hanesan infraestutura ida-ne’ebé importante hodi fasilita populasaun sira troka komérsiu prodús no fa’an ba ema selu ne’ebé la prodús. Komérsiu iha rai-laran di’ak presiza merkadu hanesan fatin ida hodi akomula ema vendedór no kompradór haburas ekonomia.

Iha fatin hanesan, Administradór postu Uatucarbau, Alfredo dos Santo, haktuir, área merkadu Uatucarbau nu’udar sentru ne’ebé ba futuru sei eskolla fila fali fatin seluk maka konstrui merkadu tanba fatin dadaun uza ba merkadu nu’udar sentru.

“Ba futuru maka hadi’a merkadu ami hakarak sei eskolla ba fatin seluk tanba fatin ne’ebá ita haree sai sentru. Se merkadu nafatin halo ne’ebá foer mós sai barak nune’e ha’u hanoin karik merkadu halo sei buka fali fatin seluk. Antes ne’e, orsamentu hamutuk $20 mill aloka ba postu Uatucarbau, maibé ha’u deside halo fali salaun postu adiministrativu Uatucarbau nian tanba ne’e maka agora merkadu seidauk hadi’a. Nune’e mós foin lalais diresaun munisípiu Viqueque fó hatene ona ha’u atu hadi’a merkadu, maibé ha’u dehan hanoin atu harii merkadu ita eskolla fali fatin seluk maka konstrui merkadu,” nia haktuir.

Tuir dadús populasaun postu Uatucarbau 2021 hamutuk rihun 5.420 kompostu husi suku neen no aldeia 30. Husi dadús ne’e abitante agrikultór hamutuk rihun 1.183 moris vida agrikultura no abitante na’in-79 moris vida negosiante iha postu adiministrativu Uatucarbau.

Tuir dadús populasaun postu Uatucarbau 2021 hamutuk rihun 5.420 kompostu husi suku neen no aldeia 30. Husi dadús ne’e abitante agrikultór hamutuk rihun 1.183 moris vida agrikultura no abitante na’in-79 moris ho vida negosiante iha postu administrativu Uatucarbau.

Notísia relevante:Negosiante postu Uatucarbau preokupa ho kondisaun merkadu grave

Jornalista : Vitorino Lopes da Costa

Editór        : Rafael Ximenes de A. Belo