VIQUEQUE, 28 dezembru 2023 (TATOLI)-Ekipa husi Ministériu Komérsiu no Indústria (MKI), kinta ne’e, introdús programa IX Governu konstituisionál kona-ba dezenvolvimentu ekonómia nasionál iha área komérsiu no indústria ba abitante postu adiministrativu Uatucarbau, munisípiu Viqueque.
Diretór Jerál husi MKI, Cosme Fátima Baptista da Silva, espresa, IX Governu konstituisionál lidera husi Primeiru Ministru (PM) Xanana Gusmão durante tinan lima hodi servii ba povu Timor-Leste no presiza mós entidade sira-nia apoia komtribuisaun ba valór Timor-Leste nian.
“Tanba ne’e, ami ohin mai hodi introdús kona-ba divulgasaun “Politika IX Governu Konstituisionál kona-ba dezenvolvimentu ekonómiku nasionál iha área komérsiu no Indústria” ba ita-nia abitante sira iha postu Uatucarbau atu bele komprende no entende ba programa IX Governu nian”,Cosme Fátima Baptista da Silva, hateten ba jornalista sira, hafoin ramata divulgasaun “Politika IX Governu Konstituisional kona-ba dezenvolvimentu ekonómiku nasionál iha area komérsiu no Indústria iha postu Uatucarbau, kinta ne’e.
Diretór Jerál MKI ne’e hatutan, atu lori povu Timor-Leste hetan moris di’ak la’ós responsavél Governu nian de’it, maibé ema hotu-hotu ninia responsavél.
“Ita atu lori ita-nia nasaun ba susesu presiza ita hotu-hotu nian responsavél, nune’e ita bele lori povu ida-ne’e ba moris di’ak. Tan ne’e, Ministériu Komérsiu no Indústria ho ninia programa prioridade ida maka dezenvolvimentu ekonomia iha área komérsiu no indústria ne’ebé sai importante tanba ita halo produsaun ita presiza halo komérsiu hodi lori produtu ba merkadu tantu nasionál no internasionál,” nia espresa.
Alende ne’e nia dehan, dezenvolvimentu área indústria sai importante bainhira laiha indústria sei la dezenvolve ekonómia iha Timor Leste tanba ne’e, área indústria no ekonómia fator importante.
“Ho ida-ne’e ita presiza ko’alia indústria no komérsiu Timor-Leste ninia ekonomia di’ak, ita tenke dezenvolve indústri no komérsiu atu nune’e ita bele sobrevivu tanba ne’e Governu tau importánsia área rua ne’e, la’ós Governu mesak maka halo dezenvolve, maibé povu tomak partisipasaun ba dezenvolve indústria no komérsiu. Se povu la partisipa, milagre sei la mosu tanba ne’e ami mai introdús indústria no komérsiu ba abitante sira,” nia realsa.
Tanba ne’e nia dehan, Ministériu Komérsiu Indústria hakarak atualiza servisu ba abitante sira iha baze hodi bele komprende área indústria no komérsiu.
“Ami mós husu abitante sira tenke kria pás no establidade iha baze hodi simu dezenvolvimentu iha nasaun Timor Leste,” nia hato’o.
Iha divulgasaun “Politika IX Governu Konstituisionál kona-ba dezenvolvimentu ekonómiku nasionál iha área komérsiu no Indústria, abitante postu Uatucarbau, Andre Fernandes, husu MKI kria atividade mikro pekena ba joven sira iha postu Uatucarbau tanba joven barak hakarak kria, maibé sempre hasoru difikuldade oi-oin nune’e presiza MKI nian tulun ba joven sira iha área rurál.
“Ami husu MKI sebele buka dalan ba joven sira hodi kria netik atividade mikro pekena ba joven sira liuliu iha área rurál. Tanba joven barak iha interrese, maibé sira sempre hasoru difikuldade. Ho oportunidade ida-ne’e ministériu bele tau ba atensaun”, nia husu.
Iha fatin hanesan, Administradór postu Uatucarbau, Alfredo dos Santos agradese ekipa MKI prezensa iha postu Uatucarbau tanba durante ne’e abitante sira hein, hakarak rona Komérsiu no Indústria.
“Ha’u husu agradese ba ekipa MKI ne’ebé marka iha postu Uatucarbau hodi bele indústria no komérsiu ba ita-nia abitante sira atu sira bele komprende di’ak liután”, nia hato’o.
Tuir dadús populasaun postu Uatucarbau 2021 hamutuk rihun 5.420 kompostu husi suku neen no aldeia 30. Husi dadús ne’e abitante agrikultór hamutuk rihun 1.183 moris vida agrikultura no abitante na’in-79 moris vida negosiante iha postu adiministrativu Uatucarbau.
Atividade ne’e durante loron rua ohin hala’o iha salaun postu Uatucarbau no aban (sesta) sei hala’o suku Loi-Ulu. Atividade ne’e hetan partisipa maximu husi autoridade lokál no abitante sira husi postu Uatucarbau kuaze 100-resin
Ekipa husi MKI kompostu husi Diretór Jerál MKI, reprezentante Sentru Lojistika Nasionál (CLN-sigla Portugés), xefe Gabineti MKI.
Jornalista: Vitorino Lopes da Cos
Editór : Rafael Ximenes de A. Belo
