DILI, 03 janeiru 2024 (TATOLI)—Embaixadór Timor-Leste ba Japaun, Elídio da Costa Ximenes, konfirma katak timor-oan hamutuk na’in-54 iha Japaun, kompostu hosi estudante na’in-47 no traballadór na’in-hitu sira nia kondisaun di’ak hela.
Reprezentante Estadu Timor-Leste ne’e hato’o kestaun ne’e relasiona ho rai nakdoko ho magnitude 7,6 iha tasi laran besik tasi ibun Noto, ne’ebé lokaliza iha Ishikawa, Japaun ho nia kle’an kilómetru 10, iha oras 16:00 iha loron segunda (01/01).
“Sira hotu di’ak maski iha rai nakdoko no ahi han aviaun iha Aeroportu Haneda,” Embaixadór Elídio hateten ba Agência Tatoli, via rede sosiál, kuarta ne’e.
Notísia relevante : IPG halo lansamentu ba sistema monitorizasaun deteta rai nakdoko iha Timor-Leste
Nune’e, hosi rai nokdoko ne’e provoka tsunami to’o metru ida liu iha área tasi oeste Japaun inklui nasaun viziñu Koreia Súl.
Ajénsia Meteorolojia Japaun informa katak akontese mós rai nakdoko kontinuasaun dala-155 hahú kedas hosi loron dahuluk rai nakdoko.
Daudaun ne’e komunidade Ishikawa hamutuk 62 mak lakon vida tanba rai nakdoko no ekipa kontinua buka komunidade ne’ebé seidauk hetan.
Aleinde ne’e iha Ishikawa detekta mós rai nakdoko iha fatin seluk iha Japaun hanesan Niigata, Toyama, Fukui, Nagano, Gifu, Tokyo, Yamagata, Fukushima, Ibaraki, Tochigi, Gunma, Saitama, Shizuoka, Aichi, Mie, Shiga, Kyoto, Osaka, Hyogo, Nara, Tottori, Iwate, Miyagi, no Akita.
Jornalista : Antónia Gusmão
Editora : Julia Chatarina
