Instituisaun superiór neen no kursu 32 sei hetan avaliasaun iha tinan ne’e

DILI, 03 janeiru 2024 (TATOLI) – Ajénsia Nasionál Avaliasaun no Akreditasaun Akadémika (ANAAA) sei avalia, iha 2024, instituisaun superiór neen no kursu 32 husi universidade públika no privada atu hetan akreditasaun. Ajénsia mós aloka ona rihun $102-resin ba atividade ne’e.

Diretór-Ezekutivu ANAAA, Nilton Paiva, informa katak prosesu avaliasaun ne’e sei halo hafoin anunsia rezultadu avaliasaun no akreditasaun ba kursu 30 no instituisaun ida ne’ebé halo iha 2023.

“Ami sei hasoru serbisu boot ida atu oinsá ami bele hala’o filafali avaliasaun ba progresu sira ne’ebé maka kursu no instituisaun sira prepara ona”, Nilton Paiva hatete ba Tatoli.

Nia salienta katak instituisaun neen ne’ebé ANAAA atu halo avaliasaun ne’e ida maka foin atu halo akreditasaun mak Universidade Katólika Timorense (UCT, sigla portugés) no lima seluk tama ona ba reakreditasaun, tanba sira-nian prazu lisensa operasionál husi Ministériu Ensinu Superiór Siénsia no Kultura (MESSK) hotu ona. Instituisaun lima ne’e maka Institutu Superiór de Filosofia e Teolojia (ISFIT), Universidade Oriental Timor Lorosa’e (UNITAL), Universidade de Dili (UNDIL), Institutu Superiór Cristal (ISC), Institutu Catolica Para a Formação Professores (ICFP) no East Timor Coffee Institute (ETCI).

Ba orsamentu rihun $102-resin ne’ebé ANAAA prevee ne’e atu uza hodi selu avaliadór internasionál no nasionál inklui akomodasaun to’o rezultadu finál. “Espera katak buat hotu la’o di’ak nune’e bele fó rezultadu ba públiku atu bele akompaña”, dehan.

ANAAA nia orsamentu ba tinan ne’e hamutuk $921.678 ba kategoria saláriu no vensimentu $410.143, bens no servisu $153.385, transferénsia públika laiha, kapitál menór $8.150 no kapitál dezenvolvimentu $350.000. Rekorde katak, iha tinan kotuk alokasaun verba ba ANAAA iha de’it $442-resin.

Ho alokasaun verba ne’e, ANAAA sei hatudu ninia responsabilidade atu uza osan sira ne’e tuir duni planu sira ne’ebé hatuur ona iha programa prioridade sira hodi bele husik konfiansa ba públiku, liuliu ba Ministru Ensinu Superiór atu nune’e tinan oin bele aumenta ANAAA nia orsamentu.

Notísia relevante: ANAAA halo avaliasaun ba kursu Empreendedorizmu iha UNPAZ

Jornalista: Tomé Amado

Editora: Maria Auxiliadora