DILI, 03 janeiru 2024 (TATOLI)—Servisu Rejistu no Verifikasaun Emprezariál, Institutu Públiku (SERVE, I.P) daudaun ne’e presiza edifísiu dignu hodi bele fó atendimentu públiku.
Diretór Ezekutivu SERVE, I.P, Florêncio Sanches, hateten, daudaun ne’e atendimentu públiku iha fali Cube House Obrigado Barrack, ne’ebé antes ne’e UN mak uza no husik hela, tanba ne’e fatin ne’e rasik ho kondisaun ladi’ak hodi halo serbisu.
“Ita uluk muda hosi Cube House tanba fatin kiik liu, tempu udan ita labele hala’o serbisu, maibé agora filafali ba ida-ne’e impaktu boot tebes tanba iha Palma Business and Trade Center loron ida bele atende ema 300 halo rejistu maibé Cube House loron ida ema 20 de’it tanba fatin la sufisiente,” Diretór informa ba Agência Tatoli, via telefónika, kuarta ne’e.
Nia dehan, razaun SERVE, I.P muda fali ba Cube House Obrigado Barrack tanba laiha osan atu selu edifísiu hodi halo serbisu.
“Ita muda serbisu fatin hosi Hudi-laran bá fali fatin uluk Cube House UN Obrigado Barrack, tanba agora ita osan laiha atu selu ka aluga tan Palm Business and Trade Center. Husu Governu ba oin oferese fatin di’ak ruma hodi ami bele halo atendimentu ba públiku ho di’ak,” nia akresenta.
Notísia relevante : SERVE,I.P husu Governu kria lei dijitalizasaun sistema rejistu hodi fasilita investór
Nune’e, Dirijente institutu públiku ne’e husu Governu presiza haree situasaun ne’e tanba haree ba polítika Governu foun, katak hakarak dezenvolve ekonomia nasaun liuhosi investimentu interna no externa.
“Odamatan dahuluk ema atu halo investimentu iha Timor-Leste ne’e sama uluk ain iha SERVE, I.P, tanba ita seidauk iha sistema rejistu online, entaun ema tenke mai fízikamente, tantu nasionál no internasioonál,” nia tenik.
Orsamentu aluga fatin Palm Business and Trade Center rasik antes ne’e kada tinan SERVE, I.P selu $150.000, maibé orsamentu aluga ne’e rasik la hetan aprovasaun iha Komisaun Revizaun Orsamentu (KRO).
“Planu harii edifísiu SERVE, I.P andar ualu iha tinan 2023 ne’e ramata no kaduka tiha, entaun tinan ne’e ha’u sei ko’alia ho Ministru tutela hodi lori fali polítika ida-ne’e, ba oin tau osan iha fundu infraestrututa hodi harii edifísiu,” Florêncio Sanches, salienta.
Jornalista : Arminda Fonseca
Editora : Julia Chatarina
