iklan

NASIONÁL, EKONOMIA, HEADLINE

Alfándega arrekada reseita millaun $103 durante tinan 2023

Alfándega arrekada reseita millaun $103 durante tinan 2023

Komisáriu Alfándega, José António Fátima Abílio. Imajen Tatoli/Francisco Sony

DILI, 04 janeiru 2024 (TATOLI)–Autoridade Aduaneira (AA)/Alfándega arrekada reseita $103.298.640,22 hosi loron 01 janeiru to’o 31 dezembru 2023.

“Reseita sira ne’e mai hosi taxa importasaun $33.594.458,10, taxa seletivu konsumu $46.168.534,14, taxa sobre venda $22.903.107,21, penalidade $302.439,37, restante maka taxa importasaun, exportasaun no taxa aduaneira sira seluk,” Komisáriu Alfándega, José António Fátima Abílio, informa ba Agência Tatoli, iha ninia knaar fatin, kinta ne’e.

Nia relata, taxa importasaun mak sa’e maka’as liu iha tinan 2023 tanba inísiu tinan hasa’e tiha taxa importasaun hosi 2,5% ba 5%, tuir mak taxa seletivu konsumu tanba iha mós verba balun sa’e hanesan bebida midar, enkuantu taxa sobre venda mantein nafatin.

Notísia relevante : Komisáriu Alfándega: “atividade ilegál iha tanba menus rekursu”

Iha tinan 2023, Portu Tibar rekolla reseita $98.261.88,62, Aeroportu Comoro $1.366.114,82, Postu Batugade $3.231.338,88, Postu Suai Salele $427.353,84, Aeroportu Suai $4.488,66, Portu Suai rihun $551, Postu Maliana $6.824,21 no postu sira seluk hamutuk $250.000.

“Atu dehan katak kompara tinan 2022 ho 2023, iha tinan 2023 mak reseita boot liu, tinan 2022 millaun $100 de’it,” Direjente ne’e akresenta.

Durante ne’e seidauk aplika taxa ba exportasaun ho razaun katak atubele atrai setór privadu sira bele prodús barak liután taxa ne’ebé aplika ba de’it importasaun.

“Tinan 2023 Autoridade Aduaneira la halo apreensaun ba produtu kontra no bandu sira maibé aplika penalidade ba kazu balun, ezemplu sasán na’in halo deklarasaun menus hosi valór no kuantidade, bainhira ida-ne’e akontese aplika penalidade no tenke selu fali diferensa ne’ebé sira komete,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!