DILI, 04 janeiru 2024 (TATOLI)–Autoridade Aduaneira (AA)/Alfándega planeia ona rekruta pesoál hamutuk na’in-60 hodi prepara ba adezaun Timor-Leste ba Organizasaun Mundiál Komérsiu (OMK) no Asosiasaun Nasaun Sudeste Aziátiku (ASEAN, sigla inglés).
“Aprova ona atu 60 postu ba Alfándega atu apoia iha adezaun Timor-Leste nian ba ASEAN no OMK, prosesu rekrutamentu ne’e mak seidauk la’o, maibé termu referénsia ami fó hotu tiha ona ba Ministériu Negósiu Estranjeiru no Kooperasaun hodi submete ba Komisaun Funsaun Públika hodi loke rekrutamentu,” Komisáriu Alfándega, José António Fátima Abílio, informa ba Agência Tatoli, iha ninia knaar fatin, Palásiu Governu, kinta ne’e.
Rekrutamentu ne’e iha ninia kritériu rasik, katak presiza ema ida kualifikadu, liu-liu tenke hatene lian inglés.
“Tanba lian ne’e importante atubele partisipa iha fórum internasionál,” nia akresenta.
Notísia relevante : Alfándega arrekada reseita millaun $103 durante tinan 2023
Razaun seluk ne’ebé Governu hakarak halo rekrutamentu ba pesoál Alfandega tanba funsionáriu ezistente maioria tama ona iha idade avansadu.
“Haree hosi sira-nia dezempeñu komesa menus, entaun Alfándega presiza ema produtivu ne’ebé presiza rekruta foun joven sira hodi asume responsabilidade ho di’ak, tanba ami mós nota katak sira ne’ebé ho idade avansadu halo atendimentu iha postu entrada sira ladún efetivu maibé pasiénsia tenke utiliza lai sira enkuantu seidauk iha polítika foun hodi halo reforma, funsionáriu Alfándega ne’ebé idade liu 50 besik 30%,” Komisáriu dehan.
Rekrutamentu ne’e tuir loloos halo ona iha tinan 2023 maibé iha difikuldade balun entaun realiza fali iha 2024.
“Rekrutamentu ne’e loke ba públiku no sei fó prioridade liu ba joven sira ne’ebé foin gradua tantu hosi universidade rai-laran no rai-li’ur”, responsável ne’e adianta.
Jornalista : Antónia Gusmão
Editora : Julia Chatarina
