DILI, 04 janeiru 2024 (TATOLI)–Komisáriu Alfándega, José António Fátima Abílio, informa, pasajeiru besik rihun 10 halo viajen bá rai-li’ur durante férias natál no tinan foun 2024.
“Ami haree hosi pasajeiru sira ne’ebé tama no sai, sira sempre custom declaration durante natál no tinan foun (2024), ne’e timor-oan sai hosi Timor bá rai-li’ur mós barak no tama mós barak, pur volta rihun 10,” Komisáriu Alfándega, hateten ba Agência Tatoli, iha ninia knaar fatin, Palásiu Governu, kinta ne’e.
Nia dehan, pasajeiru sira ne’e maioria halo viajen liuhosi fronteira Batugade, enkuantu Aeroportu Comoro mós iha maibé volume la boot.
Notísia relevante : Alfándega arrekada reseita millaun $103 durante tinan 2023
“Sira maioria viajén bá Indonézia, hosi perspetiva Alfándega nian katak sira ne’e maioria bá kompra sasán, vizita família ida ka rua de’it,” nia akresenta.
Iha sorin seluk, Komisáriu Alfándega ne’e preokupa mós katak, timor-oan sira gasta osan hodi sosa fugete hodi goja iha festa natál 2023 no tinan foun 2024.
“Realidade ita haree katak iha natál kalan no 31 dezembru, maluk timor-oan sira tiru fugete kuaze kalan tomak, ne’e ita imajina tiru to’o loron ne’e osan hira mak ita gasta ba sosa fugete, ne’e signifika Timor la kiak, Timor iha osan maibé gasta arbiru, em vez de uza osan ba buat seluk maibé tanba de’it haksolok iha loron boot, entaun ita uza osan la tuir dalan apropriadu,” Komisáriu tenik.
Jornalista : Antónia Gusmão
Editora : Julia Chatarina
