DILI, 04 janeiru 2024 (TATOLI)—Timor-Leste simu ona remesa millaun $119 hosi traballadór timor-oan ne’ebé serbisu iha Austrália no Koreia Súl, liuhosi programa Sekretaria Estadu Formasaun Profisionál no Empregu (SEFOPE).
“Ita-nia traballadór sira ne’ebé bá serbisu iha Austrália no Koreia Súl rekolla remesa lori mai akumula iha ita-nia rai-laran tuir report ne’ebé ami halo ho Banku Sentrál hamutuk millaun $119,” Diretór Nasionál Empregu Estranjeiru SEFOPE, João Correia Pereira, informa ba Agência Tatoli, iha ninia knaar fatin, Becora, kinta ne’e.
Notísia relevante : SEFOPE mobiliza ona traballadór 4.582 bá Austrália iha tinan 2023
Remesa akumuladu hosi Austrália millaun $76 sura hosi tinan 2012 to’o 2023 no Koreia Súl millaun $43 hahú hosi tinan 2009 to’o 2023.
Remesa osan mai rai-laran hosi traballadór timor-oan hamutuk 13.295 ne’ebé serbisu iha Austrália no traballadór 5.868 iha Koreia Súl.
“Remesa ne’ebé traballadór sira rekolla iha benefísiu boot tebes tanba bele hadi’a sira-nia moris, ekonomia familia no seluk tan. Aleinde sira servisu haruka osan mai sira mós bele hetan esperénsia foun filafali mai dezenvolve nasaun ne’e,” nia tenik.
Jornalista : Arminda Fonseca
Editora : Julia Chatarina
