DILI, 04 janeiru 2024 (TATOLI)—Sekretaria Estadu Formasaun Profisionál no Empregu (SEFOPE) mobiliza ona traballadór timor-oan hamutuk 13.295 bá serbisu iha Austrália hahú hosi 2012 to’o 2023.
“Hosi númeru traballadór 13.295 ne’e, ita konsege mobiliza 3.572 bá Austrália iha tinan 2022 ikus, nune’e progresu ne’ebé ita hetan iha tinan 2023 mak mobiliza traballadór bá serbisu iha Austrália ne’e sa’e maka’as tebes tanba traballadór hamutuk 4.582 hetan oportunidade bá serbisu,” Diretór Nasionál Empregu Estranjeiru, João Correia Pereira, informa ba Agência Tatoli, iha ninia knaar fatin, Becora, kinta ne’e.
Notísia relevante : SEFOPE haruka ona traballadór 1.301 bá Austrália desde janeiru-maiu 2023
Hosi númeru ne’ebé iha, traballadór 2.361 foin hetan oportunidade bá serbisu no traballadór 2.221 seluk konsege serbisu ona no hetan tan oportunidade.
Traballadór sira bá serbisu iha Austrália ne’e kontratu la hanesan, balun hetan tempu naruk (tinan-tolu ba leten) no balun tempu badak (fulan-neen to’o sia).
“Ba tinan ne’e, númeru traballadór ne’ebé sei bá serbisu iha Austrália ba tempu naruk nian hamutuk 571 no tempu badak 5.000 resin,” nia akresenta.
Aleinde ne’e, SEFOPE rejista traballadór hamutuk 824, kompostu hosi feto 173 no mane 651 ses ona hosi sistema, hahú hosi tinan 2012 to’o 2023.
Jornalista : Arminda Fonseca
Editora : Julia Chatarina
