DILI, 05 janeiru 2024 (TATOLI)—Ministériu Transporte no Komunikasaun (MTK) liuhosi Diresaun Nasionál Transporte Terrestre (DNTT) rejista veíkulu hamutuk 86.823 tama mai Timor-Leste iha tinan 2023 nia laran.
“Hosi númeru veíkulu 86.823 ne’e ba karreta hanesan silindru, loader, kamiaun no seluk tan hamutuk 28.587 no ba motór hamutuk 58.236,” Diretora Nasionál Transporte Terrestre, Maria Antónia, informa ba Agência Tatoli iha ninia knaar fatin, DNTT Balide, sesta ne’e.
Notísia relevante : Governu halo leilaun veíkulu importadu 43 hosi Austrália
Reseita akumuladu hosi veíkulu importasaun $2.160.287, transporte públiku $140.838, karta kondusaun $491.299 no inspesaun veíkulu $1.387.946, nune’e totál reseita $4.180.371
Aleinde ne’e, DNTT mós rejista transporte públiku ne’ebé tama no sai hosi Fronteira Batugade iha tinan 2023 nia laran, karreta hosi Indonézia mai Timor-Leste 7.408, Timor-Leste bá Indonézia 4.817, no Dili bá Rejiaun Administrativa Espesiál Oé-cusse Ambeno (RAEOA) liu Batugade 3.228, númeru ne’e ba karreta Governu rasik 258.
Jornalista : Arminda Fonseca
Editora : Julia Chatarina
