Top

Konstursaun Uma Naroman ba Povu 9 iha Samalari atinje ona 90%

Uma Kbiit-Laek. Imajen/Espesiál

DILI, 05 janeiru 2024 (TATOLI)—Xefe suku Samalari, postu administrativu Baucau Vila, munisípiu Baucau, Rui Magno Siqueira, hateten Uma Naroman ba Povu (UNP) sia (9) ne’ebé konstrui iha suku Samalari ne’e atinje ona 90%.

Notísia Relevante: Konstrusaun “Uma Naroman ba Povu 2023” sei hahú iha maiu

“Uma Naroman ba Povu hamutuk sia ne’ebé mak halo iha tinan hirak liubá ne’e atinje ona90%, hein entrega de’it ona tanba falta nahe azuleju, taka plafon no pinta,” nia hateten ba Agência Tatoli, liuhosi telefónika, sesta ne’e.

Lideransa komunitária ne’e hatutan, konstrusaun UNP sia ne’e tinan 2022 nian no konstrusaun UNP 2021 nian ne’e iha UNP tolu (3) mak entrega ona ba benefisiáriu hodi hela.

Tuir nia, iha Uma Naroman ba Povu sia (9) seluk planeia ba tinan 2023 nian mak seidauk tanba iha mudansa lideransa no estrutura, entaun sei pendente hela.

“Ita hein de’it bainhira mak sira muda títulu ka oinsá. Ami hein rezultadu hosi IX Governu Konstitusionál bainihira mak kontinua fali. Ami hanesan povu la’o tuir saida mak Governu planeia no Governu nia programa prioridade sira,” nia hateten.

Uma Naroman ba Povu tinan 2021 Governu aloka millaun $25 hodi konstrui uma hamutuk 1.254 no ba tinan 2022 nian ne’e, Governu aloka tan millaun $36 ba uma hamutuk 4.000 iha territóriu nasionál.

Antes ne’e Ministru Administrasaun Estatál (MAE), Tomas Cabral, hateten ezisténsia Programa Nasionál Dezenvolvimentu Suku (PNDS) hosi tinan 2013-2023 iha dezafiu no problema ne’ebé mak presiza aselera no finaliza tanba orsamentu sei iha millaun $32 iha konta administrasaun suku nian.

“Orsamentu ne’e ita tenke uza to’o ramata tanba nia ba tiha ona transferénsia públika no ezekusaun uza tenke ramata, mak hafoin ita bele halo programa kontinuasaun. Tanba, iha tinan 2021, transfere millaun $21 no ezekuta de’it millaun $19-resin no sei falta millaun $2.59. Depois iha tinan 2022, transfere tan millaun $65 no sei falta millaun $28. Nune’e, osan ne’ebé sei hela konta administrasaun suku nian iha millaun $32,” ministru ne’e dehan.

Tuir nia, ida-ne’e sai hanesan dezafiu boot hodi kontinua programa refere tanba osan ne’e liuhosi transferénsia Públika nian nune’e tenke ezekuta hotu.

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!