DILI, 05 janeiru 2024 (TATOLI) – Ministériu Edukasaun (ME) sei konstrui, entre 2024 no 2028, sala aula hamutuk 1.500 atubele kompleta númeru sala aula ne’ebé maka ministériu hakarak atinje hodi bele responde ba nesesidade alunu sira-nian iha territóriu.
Ministra Edukasaun, Dulce de Jesus, afirma katak planu atu harii tan sala aula iha tinan lima nia laran ne’e sei halo ho neneik no ba konstrusaun refere sei lahalo hanesan modelu ne’ebé maka Governu anteriór halo iha kada eskola sira ho kuantidade sala aula rua ka tolu de’it tuir nesesidade eskola nian, maibé konstrusaun ne’ebé Ministériu Edukasaun hakarak halo ne’e ho pakote kedan.
“Ezemplu, eskola bázika filiál ida ninia prototipu presiza sala aula neen, ministériu sei konstrui edifísiu rua ho sala aula neen. Ba eskola bázika sentrál nia prototipu presiza sala aula 12 sei konstrui mós edifísiu haat, nune’e bele tama pakote ida iha kedan resintu eskola nian”, governante informa iha Vila Verde, ohin.
Dulce de Jesus salienta katak konstrusaun ne’e sei realiza durante tinan lima nia laran, nune’e bele responde ba situasan dezastre naturál ruma bainhira afeta eskola sira sei la prejudika prosesu aprendizajen ba alunu sira, tanba sala aula kontinua sufisiente ba sira.
Kestiona kona-ba númeru alunu ne’ebé kontinua aumenta, ministra dehan sala aula maka seidauk to’o, signifika sei presiza tan atu kria barak nune’e bele fasilita estudante sira estuda ho di’ak.
Durante ne’e ministériu prevee osan no parseiru dezenvolvimentu sira mós tau verba, maibé sala aula la to’o nafatin, nune’e maka presiza atu hatuur planu no programa sira ho di’ak no loloos atubele responde difikuldade sira iha tinan lima nia laran.
“Karik tinan ne’e ita hahú aselera ona kontrusaun ho mentade númeru sala de aula, depois tinan oin ita aselera tan númeru sira ne’e. Ha’u hanoin la to’o tinan lima ita la enfrenta ona problema ho alunu sira kona-ba limitasaun sala de aula. Tanba osan ne’ebé ita presiza ho montante millaun $80 atu konstrui sala aula 1.500 ne’e labele responde hotu, entaun ita tenke la’o neneik to’o tinan lima nia laran hodi bele kompleta”, afirma.
Rekorde katak Governu anteriór aloka liu millaun $20 ba projetu konstrusaun no reabilitasaun infraestrutura edukativa (PKRIE) 202 ho sala-de-aula hamutuk 657.
Implementasaun PKRIE iha territóriu dezde 2021 no konsege inaugura ona eskola hamutuk 170-resin, maibé iha projetu balun maka oras ne’e sei iha hela prosesu nia laran, tanba balun hetan difikuldade, liuliu mudansa klimátika ne’ebé halo projetu ne’e tenke adia nia prosesu konstrusaun no reabilitasaun.
Notísia relevante: Grupu komunitáriu sira tenke finaliza PKRIE 50 iha novembru
Jornalista: Tomé Amado
Editora: Maria Auxiliadora
