iklan

NASIONÁL, HEADLINE, OEKUSI

PM Xanana hakarak hasoru Oé-cusse oan molok hili estrutura autoridade

PM Xanana hakarak hasoru Oé-cusse oan molok hili estrutura autoridade

Primeiru-Ministru, Kay Rala Xanana Gusmão no Ministru Administrasaun Estatál, Tomas Cabral, konvoka enkontru ho Komisaun Tranzisaun RAEOA, iha sala reuniaun Gabinete Fronteira Marrítima, Palásiu Governu, sesta (05/01/2024). Imajen Tatoli/Francisco Sony

DILI, 05 janeiru 2024 (TATOLI)–Primeiru-Ministru (PM), Kay Rala Xanana Gusmão, akompaña ho Ministru Administrasaun Estatál, Tomas Cabral, sesta ne’e, konvoka reuniaun ho Komisaun Tranzisaun iha Rejiaun Administrativa Espesiál Oé-cusse (RAEOA).

Komisaun ne’ebé Governu haruka ba Oé-cusse hodi haree termu entrega estrutura sesante ne’e koordena hosi Sebastião José Luís dos Santos Pereira, Dulce Guterres Junior, Agostinho Caet, Francisco da Costa Soares ‘Borlaku’, Benedito Escorial Fernandes, Januário Maia Guterres no Ricardo Alves Delgado.

Komisaun Tranzisaun nota katak Oé-cusse oan balun iha kapasidade lidera RAEOA, tanba ne’e husu atu Governu tau konsiderasaun.

“Primeiru-Ministru hateten katak molok hili estrutura iha tempu badak sei halibur Oé-cusse oan sira,” Koordenadór Komisaun Tranzisaun, Sebastião José Luís dos Santos Pereira, informa, hafoin ramata reuniaun ho Xefe Governu iha sala reuniaun Gabinete Fronteira Marrítima, Palásiu Governu.

Notísia relevante : Prezidente Repúblika promulga ona alterasaun lei RAEOA no ZEESM

Durante enkontru ho Xefe Governu, komisaun hato’o relatóriu serbisu finál iha Oé-cusse.

“Ami aprezenta relatóriu ba Primeiru-Ministru hodi hetan apresiasaun, durante ami iha ne’ebá ami halo levantamentu dadus tanba antes ne’e estrutura sesante RAEOA hato’o tiha ona relatóriu ba Primeiru-Ministru ami ba hodi simu fali relatóriu hodi analiza,” nia akresenta.

Maski nune’e, Koordenadór rejeita fó sai kontíudu relatóriu ho razaun sensitivu no iha kestaun jurídiku.

“Ezemplu ami husu sira atu fornese saldo iha konta bankária maibé sira labele fó tanba liga ho kestaun jurídiku oitoan, maibé ami konfirma ho banku felizmente banku mós labele fornese pesoál ida nia konta bankária sein autorizasaun hosi superiór, ida-ne’e sai difikuldade ba ami,” nia tenik.

Komisaun Tranzisaun ninia rekomendasaun maka tenke estabelese ona estrutura RAEOA.

“Rekomendasaun prinsipál ami-nian ba Governu maka iha tempu badak tenke estabelese ona estrutura foun tanba estrutura sesante halo tiha ona karta rezignasaun,” nia salienta.

Iha biban hanesan, PM Xanana, hateten, semana oin Governu sei realiza reuniaun ezekutivu hodi hili estrutura Oé-cusse hodi bele halo serbisu.

“Atu dehan de’it katak ami halo planu oinsá para kuarta semana mai ne’e iha reuniaun Konsellu Ministru atu harii estrutura foun iha Oé-cusse hodi sira bele hala’o ona serbisu,” Xanana Gusmão, tenik.

Xefe Governu komprometidu katak prontu serbisu hamutuk ho estrutura foun ne’ebé sei mai tanba kompromisu IX Governu nian katak iha tinan lima-ne’e hakarak kria kondisaun di’ak iha Oé-cusse no munisípiu sira hotu.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!