iklan

NASIONÁL, HEADLINE, OÉ-CUSSE (RAEOA), POLÍTIKA

Prezidente Repúblika promulga ona alterasaun lei RAEOA no ZEESM

Prezidente Repúblika promulga ona alterasaun lei RAEOA no ZEESM

Ponte Noefefan iha Oé-cusse . Imajen/ZEESM

DILI, 30 novembru 2023 (TATOLI)–Prezidente Repúblika (PR), José Ramos Horta, kinta ne’e, promulga ona alterasaun datoluk ba lei númeru 3/2014, loron 18 juñu, ne’ebé kria Rejiaun Administrativa Espesiál Oé-cusse Ambenu (RAEOA) no Estabelese Zona Espesiál Ekonomia Sosiál Merkadu (ZEESM).

Proposta alterasaun lejislativa ida-ne’e hetan aprovasaun hosi Konsellu Ministru iha reuniaun estraordinária iha loron 25 setembru 2023 no aprova ona hosi Parlamentu Nasionál (PN) iha loron 20 novembru.

“Objetivu hosi alterasaun lei númeru 3/2014, ne’ebé kria RAEOA no ZEESM mak atu hadi’a estatutu RAEOA nian, atualiza estatutu ne’e hodi reflete mudansa iha jestaun Administrasaun Publika Nasionál no Finansa Públika,” refere nota ne’ebé Agência Tatoli asesu, kinta ne’e.

Nota ne’e esplika, relasaun ba tutela no superintendénsia ne’ebé Governu ezerse iha rejiaun ne’e mós ajusta ona ho fortalesimentu mekanizmu kontrolu no autonomia orsamentál no finanseira RAEOA nian.

Hasai mós referénsia hotu ba Zona Espesiál Ekonomia Sosiál Merkadu Oé-cusse Ambenu no Ataúru, atu nune’e bele kria modelu ne’ebé bele adota iha parte oin-oin iha territóriu nasionál, ho definisaun zona espesiál ba dezenvolvimentu ekonómiku sei delega ba diploma ketak ida.

Notísia relevante : PN aprova alterasaun lei kriasaun RAEOA-ZEESM iha finál globál

Iha ninia intervensaun, durante debate propostaLei ida-ne’e iha Parlamentu Nasionál, Ministru Prezidénsia Konsellu Ministru, Agio Pereira, afirma katak ida-ne’e maka hanesan oportunidade boot hodi avansa, hodi hadi’a, hodi promove seguransa jurídika no kultura ne’ebé rigór iha RAEOA.

Ministru Prezidénsia Konsellu Ministru, hateten tan katak, IX Governu Konstitusionál lakohi impede dezenvolvimentu ekonomiku no sosiál País nian, tanba ne’e kontráriu tebes, IX Governu hakarak permite katak dezenvolvimentu ekonómiku no sosiál ida-ne’e to’o ba ema hotu, tanba ne’e, presiza kria instrumentu legál ne’ebé maka abilita Governu hodi intervein iha zona sira ne’ebé dezfavoresida liu no halo intervensaun ida ne’e ba populasaun no ho populasaun.

“Rejime ida ne’ebé tau ema iha sentru. Modelu ida ne’ebé kombate eskluzaun sosiál, ho dimensaun demokrátika no partisipativa ida. Espasu ida iha ne’ebé sei prodús bens ka sasán no presta servisu kriadór empregu ne’ebé mak iha impaktu ekonómiku no sosiál, importante ba komunidade,” governante ne’e tenik.

Ministru Agio garante mós katak Governu iha intensaun hodi kria modelu ida ne’ebé bele adota iha parte hotu-hotu iha territóriu nasionál tanba ‘zona espesiál’ labele sai fali eskluzivu iha parte balun de’it iha territóriu Timor-Leste, tenke bele duni adota iha parte hotu nasaun nian atu kombate asimetria rejionál sira. Modelu ida ba zona espesiál sira dezenvolvimentu ekonómiku nian ne’ebé ba Timor-Leste rasik ne’ebé haree ba espesifisidade oin-oin iha rejiaun sira ita-nia nasaun .

Governu hein promulgasaun hodi troka estrutura

Primeiru-Ministru (PM), Kay Rala Xanana Gusmão, durante nia enkontru semanál ho Prezidente Repúblika, hateten katak Governu sei halo nomeasaun foun ba estrutura autoridade RAEOA promulga ona lei kriasaun RAEOA no ZEESM.

“Ha’u sei bele ko’alia bainhira lei promulga tiha hosi Prezidente Repúblika,” Xanana Gusmão, tenik hafoin reuniaun iha Palásiu Prezidensiál, Bairru-Pité, kinta ne’e.

Notísia relevante : Arsénio Bano sei la defende OJE 2024 bá RAEOA iha PN

Biban ne’e, Xefe Governu dehan nia parte sei haree kontíudu karta rezignasaun hosi estrutura RAEOA.

PN liuhosi reuniaun plenária aprova proposta-lei númeru 2/VI/1a, alterasaun datoluk lei númeru 3/2014, 18 juñu, ne’ebé kria RAEOA no estabelese ZESSM no Ataúro iha finál globál ho votu a-favór 41, kontra 0 no abstensaun haat.

Ho aprovasaun ne’e meza envia proposta-lei rua ba iha Prezidente Repúblika, ne’ebé iha kompeténsia eskluziva atu promulga ka veta.

Objetivu prinsipál lima

Durante diskusaun iha plenária Ministru Prezidénsia Konsellu Ministru, Agio Pereira, aprezenta objetivu prinsipál lima hosi proposta alterasaun lei RAEOA.

Objetivu dahuluk, hakarak atu hadi’a estatutu RAEOA no atualiza estatutu ne’e hodi hatudu mudansa iha jestaun administrasaun públika nasionál no finansa públika.

Proposta ne’e, ninia objetivu mós mak atu ajusta dispozisaun kona-ba relasaun tutela no superintendénsia ne’ebé Governu tenke ezerse, hanesan órgaun soberanu kona-ba rejiaun ne’e. Proposta ne’e mós propoin atu hametin mekanizmu kontrolu no autonomia orsamentál no finanseira RAEOA nian, nune’e bele hanesan liu ho setór públiku administrative.

Ho proposta lei ne’e, Governu propoin atu hasai posibilidade RAEOA nian atu iha rejime fiskál rasik, hodi mantein unidade rejime tributáriu nasionál.

Maski nune’e, proposta ne’e sei permite hodi kria impostu espesífiku, taxa impostu nian ne’ebé la hanesan no atribui parte balun hosi impostu ne’ebé kobra ona iha rejiaun hanesan reseita lokál.

Objetivu daruak, atu hasai lei númeru 3/2014, 18 juñu, konseitu kona-ba ordenamentu jurídiku estranjeiru, hanesan orden ezekutiva, ne’ebé laiha suporte konstitusionál no la tuir realidade lokál.

Ida-ne’e sei permite katak RAEOA fó-sai regulamentu administrativu rejionál sira, bainhira regra sira-ne’e tuir lei ne’ebé vigora iha territóriu nasionál.

Objetivu datoluk, atu integra norma sira-ne’ebé hatuur ona iha dekretu-lei númeru 5/2015, 22 janeiru, ba lei númeru 3/2014, tanba Governu konsidera norma sira-ne’e tenke trata tuir lei hosi Parlamentu Nasionál.

Proposta ne’e buka atu estabelese ho loloos asuntu sira-ne’ebé kompete eskluzivamente ba Governu no ba matéria sira-ne’ebé bele delega ka bele halo de’it hosi RAEOA.

Asuntu sira hanesan defeza, seguransa, orden públika, relasaun externa, kooperasaun bilaterál no multilaterál no atividade petrolífera tenke nafatin iha kompeténsia eskluziva hosi Governu.

Objetivu dahaat, atu ajusta estatutu RAEOA tuir klasifikasaun ne’ebé estabelese ona iha tinan 2022 hosi Tribunál Rekursu, ne’ebé integra ba iha administrasaun indireta Estadu.

Ida-ne’e signifika katak, Prezidente Autoridade Rejiaun bainhira hala’o ninia kna’ar tenke presta konta ba Primeiru-Ministru kona-ba ninia serbisu no dezenvolvimentu sosiu ekonómiku rejiaun nian.

Objetivu dalimak, hakarak atu delega definisaun hosi zona espesiál sira dezenvolvimentu ekonómiku nian ba diploma ketak ida, tanba ne’e tenke retira referénsia sira hotu kona-ba ZEESM Oé-cusse no Ataúro nian, hosi lei númeru 3/2014, 18 juñu.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!