iklan

EKONOMIA, HEADLINE, MUNISÍPIU, OÉ-CUSSE (RAEOA), POLÍTIKA

Arsénio Bano sei la defende OJE 2024 bá RAEOA iha PN

Arsénio Bano sei la defende OJE 2024 bá RAEOA iha PN

Prezidente Autoridade RAEOA, Arsénio Paixão Bano. Imajen Tatoli/Francisco Sony

OÉ-CUSSE 23 novembru 2023 (TATOLI) –  Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, promete, nia parte lakohi atu ba defende Oé-Cusse nia Orsamentu Jerál Estadu (2024) nian iha Parlamentu Nasionál (PN) tanba hatama ona pedidu rezignasaun ba Prmeiru-Ministru (PM), Kay Rala Xanana Gusmão.

Notísia relevante: PM Xanana: Governu prepara hela lori proposta OJE 2024 ba PN

Tán ne’e, nia husu Primeiru Ministru atu aselera nomeasaun lideransa foun hodi lidera fali RAEOA, nune’e bele iha tempu atu ba defende Oé-Cusse Ambeno nia osan iha Parlamentu Nasionál.

“Iha semana ida-tán, ita atu tama ba diskusaun Orsamentu Jerál Estadu 2024 nian, ha’u lakohi hanesan Prezidente Autoridade atu ba defende orsamentu ne’e, depois ema seluk maka atu mai ezekuta, tanba sé lae iha futuru, iha sala karik, dehan uluk ida ba defende ne’e, ba aprezenta osan ne’e maka sala,” Arsénio Bano, ko’alia  iha ámbitu atribuisaun sertifikadu apresiasaun ba funsionáriu sira iha Oé-Cusse, kuarta ne’e.

“Entaun ha’u hakarak lalais hodi nomeia ema foun ida, atu troka ha’u, ho ha’u-nia kolega sira, nune’e ida foun mai ne’e, sira bele komprende lei orsamentu ne’e, bele mós iha posibilidade, iha tempu atubele halo kontinuidade servisu tomak iha RAEOA,” nia informa.

Notísia relevante: Autoridade RAEOA kontinua hein despaxu ofisiál hosi Primeiru Ministru

Tuir nia, tanba durante iha loron 120 nia laran, Oé-Cusse halo ona sasán barak, funsionáriu ho lideransa autoridade, dalaruma hirus malu, tanba oras servisu liu ona mós, sei kontinua servisu nafatin, sábadu no domingo mós kontinua servisu.

“Estrada, bee-moos, eskola, servisu saúde sira, agrikultura, dalaruma ita hirus malu, ita ho ita mak servisu, la’ós halo servisu ba ha’u, no ha’u mós la halo servisu ba ema ida, ita halo servisu ba RAEOA,” nia katak.

Nia hateten, Oé-Cusse, nia problema ne’e, ida de’it, presiza respeita malu, presiza hatene haree rai Oé-Cusse atu ba oin ne’e presiza ema servisu hamutuk.

“Entaun kargu Prezidente ne’e la’ós rohan la’ek, importante maka ida atu mai troka ha’u ne’e, estrada Oésilo tenke la’o nafatin, estrada Noefefan ba Oé-Nunu tenke liu to’o Citrana, eskola sira ita lansa ne’e, tenke halo to’o hotu, inklui reabilitasaun estrada rurál sira,” nia espera.

Notísia relevante: Arsénio husu povu Oé-Cusse kontinua servisu ho vontade no hein autoridade foun

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!