OÉ-CUSSE, 21 novembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, apela ba povu Oé-Cusse, servidór Estadu atu kontinua hatudu vontade hodi presta servisu no prepara simu lideransa foun atu lidera fali Oé-Cusse Ambeno.
Arsénio Paixão Bano, hato’o nia apelu ne’e, liuhosi konferénsia imprensa ne’eb’e hala’o iha edifisiu Gabinete ZEESM Oé-Cusse, tersa ne’e.
“Ha’u husu de’it ba populasaun Oé-Cusse, servidór Estadu, funsionáriu sira, semangat nafatin, kontinua servisu nafatin hanesan bainbain, no prepara-aan atu simu autoridade foun, importante kontinua servisu ba ita-nia rai Timor-Leste, liuliu Oé-Cusse,” nia katak.
Notísia relevante: Arsénio Bano no membru autoridade rezigna-aan
Nia hateten, iha aprovasaun lei númeru 2/V1 (1a), terseira alterasaun ba Lei númeru 3/2014, loron 18, fulan juñu iha PN, hatete katak, bainhira lei ne’e altera, automatikamente, Autoridade nia mandatu mós remata.
“Tán ne’e projetu sira hotu iha Oé-Cusse sei la’o nafatin, ami iha-ne’e rezigna-aan hosi Autoridade RAEOA, la signifika projetu sira sei abandona, maibé sei kontinua la’o, no hein katak iha tempu badak Governu bele nomea nia ema sira mai iha Oé-Cusse bele kontinua servisu sira iha Oé-Cusse,” nia informa.
“Ami mós hakarak hateten, populasaun iha RAEOA hatene, ha’u ho ha’u-nia kolega sira, servisu la hetene kolen no no la hatene feriadu, sempre halo interese boot-liu ba populasaun Oé-Cusse ninian, iha suku 18 kuaze la’o hotu tanba ita hakarak, Oé-Cusse tenke sai hosi izolamentu nu’udar rai ketan ida iha Timor-Leste,” nia hateten.
Tan ne’e liuhosi desizaun rejignasaun ne’e, bele tulun IX Governu atu halais nomeasaun lideransa foun hodi dudu dezenvolvimentu la’o lais liután.
“Ita ho komunidade hakarak, labele hein kleur liu, tanba konfuzaun mosu iha fatin barak no komunidade nia leet, katak, ami mak lakohi sai, hakarak mantein nafatin iha hanesan Autoridade RAEOA, maibé hakarak hatete tán, karta ami haruka dala-10 ona ba Primeiru Ministru maibé laiha resposta,” nia haktuir.
Notísia relevante: PN aprova alterasaun lei kriasaun RAEOA-ZEESM iha finál globál
Jornalista: Abílio Elo Nini
Editór: Evaristo Soares Martins
