MESSK sei rezolve estatutu dosente Cuba na’in-neen hanorin iha UNTL
DILI, 06 janeiru 2024 (TATOLI)–Universidade Nasionál Timor-Lorosa’e (UNTL) husu ba Ministériu Ensinu Superiór Siénsia no Kultura (MESSK) atu rezolve estatutu profesór Cubanu na’in-neen, ne’ebé ninia kontratu termina ona iha dezembru 2023.
Inisiativa ne’e atu sira bele kontinua apoiu nafatin prosesu ensinu aprendizajen ba estudante sira iha Departementu Desportu Fakuldade Edukasaun Arte no Umanidade (FEAH, sigla portugés) UNTL.
“Ita-nia dosente na’in-neen hosi Cuba durante ne’e ita kontrata hodi ajuda apoiu estudante sira iha kursu Desportu Fakuldade FEAH, maibé sira-nia kontratu hotu ona to’o agora seidauk iha desizaun ida atu extende ka lae to’o agora ita la hatene,” Reitór UNTL, João Soares Martins, informa ba Agência Tatoli, iha resintu kampus UNTL, Caicoli, sábadu ne’e.
Notísia relevante : Governu altera estatutu karreira dosente atu garante kualidade ensinu superiór
Maibé Universidade informa ona ba Ministériu Juventude Desportu Arte no Kultura (MJDAK) atu haree asuntu ne’e tanba atividade kursu desportu atu loke ne’e tanba iha akordu ida entre UNTL ho MJDAK iha Governu anteriór.
Enkuantu, prezensa dosente Kubanu sira-nia hodi apoiu atividade ne’e mós apoiu hosi Governu depois maka koloka sira mai hodi hala’o atividade desportu ba estudante sira iha FEAH.
Hosi informasaun ne’ebé maka parte UNTL hato’o ba MJDAK ne’e sira konsidera katak MJDAK laiha orsamentu sufisiente atu kontinua kontarata sira tanba ne’e, ministériu refere haruka fali mai UNTL atu haree asuntu ne’e maibé hanesan de’it UNTL mos laiha orsamentu própriu hodi tau ba saláriu dosente Cubanu na’in-neen. Tanba ne’e maka to’o agora seidauk iha resposta ida atu garante katak dosente sira ne’e kontinua mantein ka lae.
Reitór UNTL ne’e afirma katak parte universidade haruka ona karta ida ba Ministériu Planemanetu no Investimentu Estratéjiku atubele ajuda sira hodi buka hela solusaun ba problema dosente Cuba na’in-neen atu nune’e labele hamate prosesu ensinu aprendizajen ba estudante sira iha departamentu desportu nia laran.
“Ita husu ona ba Ministru José Honório no Ministru Planeamentu maibé ita seidauk hatene. Espera katak ita-nia preokupasaun ne’e Ministru na’in-rua bele buka solusaun atu rezolve asuntu ne’e hodi bele fó fali resposta pozetivu mai ita,” nia tenik.
Nune’e mós, Ministru Ensinu Superiór Siénsia no Kultura, José Honório Pereira Jerónimo, promete katak kontratu ba profesór Cubanu sira sei la hotu, maibé Governu iha obrigasaun atu rezolve asuntu ne’e.
Tanba ne’e Ministériu rua sei buka solusaun hodi rezolve problema profesór Cubanu sira tanba Reitór rasik hakerek ona karta ida ba Ministru Planemanetu no Investimentu Estratéjiku no Konsellu Administrasaun Fundus Dezenvolvimentu Kapitál Humanu (FDCH, sigla portugés) sei haree hodi deskutq depois sei foti desizaun.
Dosente Cubanu na’in-neen ninia estatutu nu’udar profesór kontratadu ne’e sei iha nafatin no seidauk termina. Agora sira kontinua hanorin hela estudante sira iha kursu desportu hodi hein desizaun ida ne’ebé di’ak liuhosi Governu.
Jornalista : Tomé Amado
Editora : Julia Chatarina
