FRETILIN krítika PR Horta hala’o viajen ba rai-li’ur
DILI, 08 janeiru 2024 (TATOLI)—Deputadu hosi bankada FRETILIN iha Parlamentou Nasionál (PN), Florentino Ximenes Sinarai, krítika Prezidente Repúblika (PR), José Ramos Horta, la obedese ba regra konstituisionál tanba halo tiha viajen ba rai-li’ur mak foin haruka pedidu asentimentu ba Parlamentu Nasionál (PN).
Notísia Relevante: Kaleidoskópiu 2023: PN autoriza Horta ba rai-li’ur, opozisan husu aprezenta rezultadu vizita
“Triste tebes, Prezidente Repúblika ba tiha li’ur mak haruka pedidu konsentimentu tama mai,” Deputadu opozisaun ne’e hato’o liuhosi intervensaun iha reuniaun plenária PN, segunda ne’e.
Deputadu FRETILIN, Joaquim dos Santos Borroluli, mós preokupa desizaun asentimentu seidauk simu nota hosi PN maibé PR halo tiha ona viajen ba rai-li’ur.
“Desizaun konsentimentu kona-ba, PR nia vizita ofisiál sira ho vizita por konvite sira, ne’ebé tuir loloos Prezidente Repúblika seidauk simu nota hosi Parlamentu katak fó ou la fó konsentimentu, PR labele sai lai. Imajina, se Parlamentu la autoriza nia konsentimentu implikasaun juridíka ne’e perda mandatu,” nia hateten.
Tanba, nia dehan, PR la obedese ba regra konstituisionál no loloos ne’e Prezidente Repúblika (PR) hein PN aprova lai pedidu asentimentu sai lai mak PR bele halo viajen.
Prezidente Parlamentu Nasionál, Maria Fernanda Lay, promete bainhira ba hasoru Xefe Estadu sei hato’o katak bainhira iha ajenda vizita serbisu tenke fó antes labele hein loron atu halo viajen mak foin haruka pedidu.
“Bainhira Prezidente Repúblika fila hosi Índia, ha’u sei ba hasoru hodi husu katak vizita traballu tenke iha ajenda não e última da hora, ida ne’e mak, ha’u lamenta. Situasaun sira hotu perda mandatu presiza ¾ tanba Konstituisaun mak ko’alia ida-ne’e,” nia dehan.
PN liuhosi reuniaun plenária, segunda ne’e, aprova pedidu asentimentu dezlokasaun Prezidente Repúblika vizita ofisiál ba Índia, hahú iha loron 09 to’o 12 fulan-janeiru 2024, ho votu a-favór 43, kontra 19 no abstensaun tolu (3).
PN mós aprova, pedidu asentimentu dezkolasaun, Xefe Estadu nian vizita ofisiál ba Santa Sé iha loron 20 fulan-janeiru 2024, no vizita ofisiál ba Fransa hahú hosi 23 to’o 26 fulan-janeiru 2024 no vizita ofisiál ba Reinu Unidu hahú hosi 28 janeiru to’o loron 02 fulan-fevereiru 2024.
Entretantu, Prezidente Repúblika, José Ramos Horta, segunda ne’e ho delegasaun dezloka ona ba Índia.
Enkuantu Parlamentu Nasionál tuir termu númeru 1 artigu 80 no alínea h) númeru 3 artigu 95 konstituisaun fó asentimentu deslokasaun Prezidente Repúblika.
Jornalista : Nelson de Sousa
Editór : Cancio Ximenes
