DILI, 08 janeiru 2024 (TATOLI)—Primeiru-Ministru (PM), Kay Rala Xanana Gusmão, prezide isar bandeira iha semana dahuluk janeiru 2024.
Iha ámbitu ne’e, Xefe Governu apela ba servidór Estadu hotu atu servisu ho profisionál no onestidade hodi serbí povu no nasaun.
“Husu ba imi hotu atu servisu ho di’ak ho profisionalizmu no onestidade, no ketak haluha osan povu nian jere ho di’ak,” Xanana hato’o iha Palásiu Governu, segunda ne’e.
Notísia relevante : Polísia Tránzitu nota servidór Estadu utiliza veíkulu Estadu tula oan ba eskola
Xefe Ezekutivu kontinua fó hanoin katak osan ne’ebé prevee bainhira la gasta hotu iha tinan ida tenke fila ba kofre Estadu, iha ámbitu taka konta jerál Estadu.
“Ita-nia Estadu sei frajíl, signifika katak sei la funsiona ho di’ak, bele la’o di’ak ona, depois ita-nia sistema finansa ne’ebé di’ak tebes iha tinan 2017 Timor-Leste sai nasaun dahuluk iha Asia tuir inisiativa transparénsia IV iha mundu, maibé iha tinan ikus mai ne’e monu rahun tanba ema hatene katak osan ne’e afinál hatama de’it iha banku laiha kontrolu,” nia kestiona.
Tanba ne’e, Xanana husu servidór Estadu atu haluha tiha imperializmu tanba marsista, komunista sira ne’ebé lori funu mate hotu ona tanba komunista, tanba ne’e daudaun tenke buka serbí ho hanoin foun.
“Hanoin foun ne’e maka hanoin ida atu servisu di’ak ho responsabilidade tomak ba povu. Tanba ne’e liuhosi biban ne’e, husu ita hotu halo reflesaun hodi iha inísiu tinan foun ne’e servisu ho di’ak, no ezekuta planu no orsamentu Estadu ho di’ak hodi eroi sira ne’ebé ita temi, maski sira laiha ona maibé sira sente katak sira-nia sakrifísiu ne’e vale duni,” Antigu Xefe Estadu ne’e tenik.
Funsionáriu sira ne’ebé partisipa iha isar bandeira iha Palásiu Governu ne’e mai hosi funsionáriu Gabinete Primeiru-Ministru, Gabinete Vise Primeiru-Ministru rua, Prezidénsia Konsellu Ministru, Vise-Ministru Asuntu Parlamentár, Sekretaria Estadu Igualdade, Sekretaria Estadu Komunikasaun Sosiál, no Gabinete Fronteira Marrítima.
Jornalista : Antónia Gusmão
Editora : Julia Chatarina
