VIQUEQUE, 08 janeiru 2024 (TATOLI)—Veteranu Viqueque oan hamutuk na’in-100 maka konkorre asesu ba Universidade Nasionál Timor-Lorosa’e (UNTL) no Institutu Politékniku Betano (IPB).
“Veteranu ninia oan ne’ebé atu asesu ba UNTL no IPB ne’e foin lalais hamutuk na’in-100, ida maka hatama ona dokumentu no tuir ona teste tanba kada munisípiu ema fó na’in-50 maka asesu nune’e númeru liu tiha, ne’ebé sei haree sira-nia valór ida-ne’ebé maka liu hodi bele asesu,” Sekretáriu Ezekutivu Konsellu Veteranu munisípiu viqueque, Daniel Sarmento Soares ‘Fogeti’, informa ba Agência Tatoli, iha postu Viqueque Vila, segunda ne’e.
Kuota ba veternu sira-nia oan asesu universidade rua ne’e, kada munisípiu ba estudante na’in-50.
“Ami foin lalais simu dokumentu hosi veteranu nia oan ne’ebé atu asesu ba UNTL no IPB ne’e liu. Entaun, agora liuhosi prosesu verifikasaun ba estudante sira-nia valór. Se na’in-50, lima de’it karik di’ak maibé liu tiha ida-ne’e, tanba ne’e sei haree valór,” nia akresenta.
Notísia relevante : Finalista eskola sekundária hosi Viqueque partisipa teste asesu UNTL no IPB
Rezultadu asesu ba instituisaun ensinu superiór rua to’o agora seidauk fó sai tanba iha etapa ne’ebé estudante sira presiza liu.
“Rezultadu asesu universidade rua seidauk iha tanba sei iha prosesu nia laran, bainhira rezultadu sai maka ba liu ne’e, ha’u husu atu esforsu-an atu estuda, labele liu tia lakohi estuda ne’e ladún di’ak,” nia hato’o.
Antes ne’e, parte komisaun halo teste ba ema kbiit laek nia oan sira hamutuk na’in-165 no veteranu nia oan hamutuk na’in-100, ne’ebé konkorre asesu ba UNTL no IPB ba tinan letivu 2024.
Jornalista : Vitorino Lopes da Costa
Editora : Julia Chatarina
