DILI, 09 janeiru 2024 (TATOLI) – Diretór-Ezekutivu Asosiasaun Defisiénsia Timor-Leste (ADTL), Cesário da Silva, husu Governu atu implementa Planu Asaun Nasionál ba Ema ho Defisiénsia (EhD).
Cesário da Silva esplika katak antes ne’e iha ministériu hamutuk 11 maka deside ona planu refere ho intensaun atu tulun Ema ho Defisiensia sira iha Timor-Leste bele asesu di’ak liután ba dezenvolvimentu nasaun nian.
“Ami haree katak Planu Asaun Nasionál ne’ebé ministériu 11 deside ne’e konsege hala’o ona, maibé seidauk másimu tanba ne’e husu ba Governu atu aselera planu sira ne’e hodi bele apoiu Ema ho Defisiénsia”, sujere.
Ministériu 11 ninia kompromisu tau verba ida hodi fó atensaun ba destinu EhD sira bazeia ba nesesidade ne’ebé sira iha, liuiu oinsá bele hetan direitu atu asesu ba edukasaun, direitu hetan apoiu sosial, bele asesu ba rampa iha edifísiu, loja no eskola ne’ebé andár, asesu ba saúde no bele artisipa iha atividade jinástika sira.
Timor-Leste antes ne’e ratifika ona iha Parlamentu Nasionál Konvensaun Internasionál Direitu ba Ema ho Defisiénsia iha fulan-jullu 2022.
Tuir sensus nasionál 2022, Ema ho Defisiensia iha territoriu hamutuk rihun 93, husi totál ne’e ema liu rihun 17 maka presiza tebes Planu Asaun Nasionál atu ajuda sira hodi bele sai husi sira-nian moris daudaun ne’e.
Ministériu sira ne’ebé maka iha ona kompromisu atu apoia EhD maka Ministériu Edukasaun, Ensinu Superiór, Solidariedade Sosiál no Inkluzaun, Obra Públika, Juventude no Desportu, Trasporte no Komunikasaun, Administrasaun Estatál, Justisa, SEFOPE no Sekretáriu Estadu Igualidade Jéneru.
Notísia relevante: ADTL husu instituisaun hotu tenke garante asesibilidade ba ema ho defisiénsia
Jornalista: Tomé Amado
Editora: Maria Auxiliadora
