iklan

POLÍTIKA

Bankada CNRT apoia PM avalia dezempeñu serbisu membru Governu

Bankada CNRT apoia PM avalia dezempeñu serbisu membru Governu

Prezidente repúblika, José Ramos Horta toma pose ba Primeiru-ministru, Kayrala Xanana Gusmão no membru governu Konstitusionál da-sia, iha Palásiu Prezidensiál, Bairru-Pité, sábadu (01/06/2023). Imajen Tatoli/Egás Cristóvão

DILI, 09 janeiru 2024 (TATOLI)—Vise Bankada CNRT iha Parlamentu Nasionál (PN), Deputadu Patrocínio Fernandes, hateten CNRT apoia Primeiru Ministru (PM), Kay Rala Xanana Gusmão, ne’ebé sei halo avaliasaun ba dezempeñu serbisu membru Governu sira-nian iha marsu 2024 ne’e, karik la halo serbisu ho di’ak mak sei tau ema seluk.

Notísia Relevante: Marsu: Xanana sei avalia dezempeñu servisu membru Governu

“Ha’u laiha komentáriu kona-ba ida-ne’e, tanba Governu ne’e kompeténsia eskluziva Primeiru-Ministru nian, ne’ebé Primeiru-Ministru iha kompeténsia atu halo avaliasaun ba ninia membru Governu sira-nia prestasaun serbisu, dedikasaun no buat sira-ne’e hotu. Serbisu refleta duni ba  espetativa Governu iha para responde ba preokupasaun públiku ka lae,” Vise bankada ne’e hateten ba jornalista sira iha uma fukun PN, tersa ne’e.

Tanba ne’e, nia dehan, ne’e kompeténsia PM nian no bankada CNRT nu’udar bankada ne’ebé sustenta governasaun ida-ne’e, kuandu ko’alia governasaun ida-ne’e Governu ne’e nia na’in mak Primeiru-Ministru no ministru sira-ne’e pesoa sira-ne’ebé PM hili atu ajuda nia.

“Tantu bankada CNRT ne’ebé atu sustenta Governu ida-ne’e konserteza nia iha nia pozisaun ida atu asegura apoia polítika tomak ne’ebé Primeiru-Ministru hola, nu’udar desizaun Estadu no polítika ba nasaun,” nia hateten.

Deputadu Bankada opozisaun FRETILIN, Joaquim do Santos, hateten PM iha kompeténsia atu  halo avaliasaun dezempeñu serbisu membru Governu sira-nian durante fulan hira ne’e nia laran.

Nune’e, PM fó sai ona sei avalia serbisu membru Governu sira,  ida-ne’e signifika durante ne’e Xefe Governu mós tau atensaun makaas ba dezempeñu serbisu membru Governu sira-nian ho másimu.

“Sira-ne’ebé lahatene ukun troka tiha, tanba povu fó fiar atu servi povu ho ema-ne’ebé iha kapasidade,” nia hateten.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!