COVALIMA, 09 janeiru 2023 (TATOLI) – Servisu Rejistu no Verifikasaun Emprezariál (SERVE) Sukursál Covalima enfrenta problema ba halo atendimentu ba sidadaun sira husi postu administrativu hitu, tanba daudaun iha de’it funsionáriu na’in-tolu.
“Ami-nian funsionáriu iha SERVE Sukursál Covalima daudaun ne’e na’in-tolu maka hala’o serbisu iha edifísiu hodi halo atendimentu ba sidadaun sira ne’ebé atu trata dokumentu”, Koordenadór SERVE Sukursál Covalima, Pedro dos Santos, hatete iha nia serbisu fatin Kampung Baru, ohin.
Funsionáriu kontratadu na’in-tolu ne’ebé maka hala’o sira-nian knaar ne’e mak koordenadór SERVE, pesoál ida iha área atendimentu públiku no seluk ba arkivu.
Antes ne’e, SERVE Covalima iha funsionáriu na’in-12, maibé na’in-sia ne’ebé serbisu ba asistente administrasaun no finansa, IT no pesoál limpeza ho baze ba desizaun la kontinua hala’o knaar.
SERVE Sukursál Covalima hala’o servisu hodi halo atendimentu ba sidadaun sira ne’ebé atu halo rejistu komersiál, renovasaun no halo alterasaun dokumentu atu loke negósiu.
Iha 2023, SERVE Covalima kontribui reseita $14.812 ba kofre Estadu. Reseita ne’ebé mai husi halo rejistu foun hamutuk 225, halo alterasaun ba dokumentu 83 no renovasaun 444.
Notísia relevante: Menus espasu, SERVE, I.P fó limitasaun ba atendimentu públiku
Jornalista: Celestina Teles
Editora: Maria Auxiliadora
