Governu atribui ona millaun $4.5 ba veteranu dezmobilizadu 15-19 hamutuk 113
DILI, 09 janeiru 2024 (TATOLI)—Sekretáriu Estadu Veteranu (SEV), César da Silva “Merak”, hateten iha 04 janeiru liubá ne’e Ministériu Asuntu Kombatente Libertasaun Nasionál (MAKLN) hamutuk ho Sekretáriu Estadu Veteranu (SEV) atribui ona $4.520.000 ba veteranu dzsmobilizadu grau 15-19 hamutuk 113.
“Atribuisaun ida-ne’e, IX Governu Konstitusionál halo kontinuidade hosi VIII Governu nian no ami atribui hahú ona iha loron 04 janeiru liubá. Ho ida-ne’e ami halo akordu ida entre MACLN ho benefisiáriu no tuir artigu 7 hateten katak benefisiáriu la halo uma mak Governu sei dada fali osan ne’ebé atribui liuhosi sira-nia osan fulan-fulan nian, to’o atinje montante ne’ebé sira simu,” Sekretáriu Estadu Veteranu (SEV), César da Silva “Merak”, hateten ba Agência Tatoli iha nia knaar fatin, Caicoli, tersa ne’e.
Sekretáriu Estadu Veteranu hateten, katak subsídiu apoiu fundu ba veteranu 113 ne’e kompostu hosi Lautém na’in-41, Baucau iha na’in-13 maibé ida mate, Viqueque na’in-28, Manatuto ida 91), Manufahi ida (1), Ainaro na’in-17 maibé moris ualu (8) no mate iha na’in-sia (9), Ermera na’in tolu (3), Liquiça na’in-ualu (8), Dili na’in-tolu (3), Bobonaro iha ida (1) maibé sei pendente tanba presiza kompleta dokumentu.
“Agora iha Munisípiu balun ne’ebé mak lahetan tanba la prienxe kritériu liuliu partisipasaun no dedikasaun eskluziva 15-19 ne’e. Maibé tuir informasaun ne’ebé ami simu ne’e veteranu ida iha Bobonaro ne’e la envolve, iha momentu ne’ebá tanba ne’e nia labele hetan subsídiu ne’e,” nia hateten.
Iha janeiru 2024 ne’e atribui ona, entaun fulan-abril mai ne’e MACLN hamutuk ho SEV sei halo fiskalizasaun ba benefisiáriu sira.
Antes ne’e, iha faze dahuluk nian iha MACLN atribui uluk ona ba veteranu desmobilizadu 116. Faze dahuluk ne’e fó ba veteranu 20-24, konstrusaun hotu ona no sira-ne’ebé la halo tanba uma iha ona.
Jornalista : Osória Marques
Editór : Cancio Ximenes
