COVALIMA, 09 janeiru 2023 (TATOLI) – Funsionáriu kontratadu Guarda Florestál na’in-18 iha Covalima ho inisiativa serbisu ho voluntáriu hodi hein desizaun ikus husi Sekretáriu Estadu Floresta, Fernandino da Costa, atubele estende sira-nian kontratu.
Voluntariadu Guarda Florestál Hemino Tilman, haktuir katak sira-nia kontratu remata ona iha 31 dezembru 2023, maibé hanesan funsionáriu nafatin iha vontade hodi hala’o serbisu ho voluntáriu.
“Ami fiar katak Sekretáriu Estadu Floresta sei haree hodi estende nafatin kontratu, nune’e ami kontinua serbisu iha Floresta Covalima”, Hemino Tilman dehan iha Kampung Baru, ohin.
Funsionáriu kontratadu ne’ebé maka durante ne’e hala’o knaar iha Floresta Covalima hetan ona formasaun iha área oioin kona-ba serbisu Guarda Florestál nian.
Xefe Departamentu Reprezentasaun Territóriál, Floresta no Planta Industriál, Domingos Gusmão, rekoñese katak funsionáriu nia kontratu hotu ona iha loron 31 dezembru, maibé sira nafatin iha vontade atu mai hala’o serbisu hodi hein desizaun husi nasionál.
Nia dehan bainhira hapara kontratadu na’in-18 sei fó impaktu ba halo kontrolu ba komunidade sira tesi ai iha área ne’ebé Estadu bandu, tanba funsionáriu permanente iha na’in-sia no labele halo kontrolu iha postu administrativu hitu.
Funsionáriu ne’ebé serbisu iha Floresta Covalima hamutuk 31, kompostu husi permanente sia, kontratadu 18, tékniku planta industriál rua, pesoál limpeza ida no ajente administrasaun ida.
Notísia relevante: Guarda Floresta Covalima menus fasilidade patróliamentu
Jornalista: Celestina Teles
Editora: Maria Auxiliadora
