iklan

EKONOMIA, HEADLINE

Ministru Marcos klarifika razaun la selu produtu loja Hakbi’it Agrikultura

Ministru Marcos klarifika razaun la selu produtu loja Hakbi’it Agrikultura

Ministru Agrikultura, Pekuária, Peska no Floresta, Marcos da Cruz. Imajen Tatoli/Francisco Sony

DILI, 10 janeiru 2024 (TATOLI)Ministru Agrikultura Pekuária Peska no Floresta, Marcos da Cruz, klarifika, razaun ministériu seidauk selu produtu agríkola ne’ebé fornese hosi loja Hakbi’it Agrikultura iha Meimart Fatuhada tanba konsidera la prienxe kritériu.

“Ita labele selu osan ho montante $51.760 ba loja Hakbi’it Agrikultura tanba iha akontesimentu inundasaun iha loron 04 abríl 2021, sira halo atividade ne’e laiha dokumentu legál ka dokumentu komprovativu atu justifika iha legalidade atu ita selu, maski produtu sira ne’e loja fahe ona,” Ministru hateten ba Agência Tatoli, iha Palásiu Governu, kuarta ne’e.

Produtu ne’ebé fornese hosi loja, antes ne’e distribui ona ba vítima inundasaun.

Nia dehan, dokumentu legál ne’ebé parte loja laiha mak hanesan dokumentu konkursu públiku, dokumentu komprovativu kontratu, lista agrikultór ne’ebé fornese produtu, lista benefisiáriu ne’ebé simu produtu inklui la envolve  Ministériu Agrikultura no Peska (atuál MAPPF-Ministériu Agrikultura Pekuária Peska no Floresta) liuhosi Diresaun Lojístika bainhira produtu tama no sai.

“Ho razaun sira ne’e mak ita labele asina hodi selu osan $51.760 tanba bainhira ita selu mak sei hamosu fali problema foun,” governante ne’e akresenta.

Notísia relevante : Ameasadu taka, jestór Loja Hakbi’it Agrikultura Fatuhada tenta rezolve internál

Ministru esplika, razaun MAPPF halo desizaun formál la subsidia ona loja Hakbi’it Agrikultura desde loron 28 dezembru 2023 tanba konsidera loja ne’e bele hamriik mesak ona nu’udar setór privadu.

Loja Hakbi’it Agrikultura rasik estabelese hetan apoiu hosi Governu liuhosi Ministériu Agrikultura no Peska no Ajénsia Kooperasaun Internasional Japaun (JICA, sigla inglés) ne’ebé antes ne’e Governu subsidia ba arrendamentu ne’ebé uza daudaun, maibé hafoin loron 29 dezembru 2023 ministériu entrega tomak ba loja hodi jere rasik.

“Hosi entrega ne’e iha ona konkordánsia katak sira mak jere rasik ona tanba sai ona nu’udar setór privadu ne’ebé rejistu ona iha SERVE, I.P nu’udar empreza privada, ne’ebé iha ona osan atu selu rasik arrendamentu,” nia tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!