DILI, 10 janeiru 2024 (TATOLI)–Ministra Finansa, Santina José Rodrigues Viegas Cardoso, informa, portál transparénsia la fusiona provizóriu tanba tékniku sira sei halo rekonsiliasaun ba orsamentu tinan 2024 nian.
“Daudaun tékniku sira halo hela rekonsiliasaun ba númeru finál, portál la funsiona tanba daudaun update hela orsamentu tinan 2024 nian iha sistema, kuandu ramata ativu hikas,” Ministra Santina hateten iha Palásiu Governu, kuarta ne’e.
Prosesu rekonsiliasaun ne’e daudaun la’o no presiza semana iha, sei termina iha loron 15 janeiru.
“Tuir lei Diresaun Jerál Tezouru bele halo prosesu paramentu ba nia papel sira ne’e no haruka ba banku to’o loron 15 janeiru,” nia akresenta.
Notísia relevante : Kaleidoskópiu 2023: Lejizlatura Daneen PN aprova programa IX Governu, OR-OJE 2024
Ministra mós hateten katak seidauk bele fó sai orsamentu hira mak filafali ba kofre Estadu tanba daudaun sei halo rekonsiliasaun dadus.
Iha sorin seluk, governante ne’e klarifika katak sistema free balance la’ós jere hosi Canada.
“Sistema free balance la’ós jere hosi Canada, baze dadus ne’ebé iha Ministériu Finansa nian dadus ita-nian iha ne’ebá. Free balance ne’e kompañia ne’ebé ninia sistema ita utiliza ba ita-nia jestaun finansa públika, ne’ebé la’ós jere hosi Canada, tékniku hosi kompañia nian sira bele mai halo apoia, maibé dokumentu no dadus iha Timor-Leste,” nia esplika.
Jornalista : Antónia Gusmão
Editora : Julia Chatarina
