DILI, 10 janeiru 2024 (TATOLI)– Sosiedade Sivíl Timor-Leste liuhosi Luta Hamutuk sujere ba Governu atu implementa polítika ordenamentu no kria bairru foun hodi prevene inundasaun ne’ebé mosu iha kapitál Dili kada tinan.
“Governu presiza duni re-organiza kapitál Dili atu sai kapitál nasaun ne’ebé iha dignidade signifika iha ordenamentu urbana, bairru sira tenke organizadu. Ita labele husik bebeik inundasaun kada tinan akontese tanba governante sira iha kbi’it atu organiza”, Diretór Luta Hamutuk, José Alves da Costa, hatete ba Agência TATOLI, iha Faról-Dili.
Luta Hamutuk mós rekomenda ba Governu atu kria bairru foun ho kondisaun dignu ne’ebé kompleta ho eskola, saúde, kampu futeból no seluk. Nune’e fatin risku sira ba inundasaun bele utiliza hodi investe ho buat seluk.
“Governu tenke hasai osan hodi hari’i atu populasaun bele selu de’it taxa ba Governu atu rekupera kustu. Opsaun mós Governu fó ba setór privadu hodi investe atu ema selu no setór ba Estadu. Governu tenke komesa ona ho planu ne’e atu evita inundasaun iha tinan lima-mai”, nia sujere.
Tanba, Diretór Organizasaun Naun Govermentál ne’e dehan governu atual mós iha planu mestre ida ne’e, maibé iha problema finanseiru. Nune’e kada tinan iha tempu bai-loron, komunidade mak hela iha mota ninin no rai kle’an hodi sente kontente, maibé iha tempu udan komunidade sira fó sala ba Governu tanba bee tama sira nia uma.
Alende ne’e, nia lamenta infraestrutura bázika rasik, liuliu valeta sira dez-organizada, ezemplu valeta Manleuana to’o mai Dili Institu Tecnology luan, maibé hosi ne’ebá mai ne’e klo’ot fali ne’ebé laiha kapasidade atu simu bee volume bo’ot.
“Laiha planeamentu ne’ebé di’ak hosi Governu no komunidade laiha konsiénsia tanba mota bele muda aan bainhira de’it, maibé obriga aan halo uma no autoridade lokál la ba kontrola katak mota bele lori populasaun ho rezidénsia”, nia lamenta.
Notísia relevante: PN rekomenda Governu prioriza polítika ordena Dili livre hosi Inundasaun
Jornalista : Jesuína Xavier
Editór : Florencio Miranda Ximenes
