COVALIMA, HEADLINE

Profesór 36 iha Eskola Sekundária Jerál Suai termina kontratu

Profesór 36 iha Eskola Sekundária Jerál Suai termina kontratu

Diretór Servisu Edukasaun munisípiu Covalima, Francelino Freitas Carvalho. Imajen/Celestina Teles.

COVALIMA, 10 janeiru 2023 (TATOLI) – Bazeia ba sirkulár ne’ebé fó sai husi Ministériu Edukasaun (ME) hodi husu eskola labele rekolla osan husi estudante maka rezulta Eskola Sekundária Jerál Públika Suai labele kontinua estende manorin na’in-36 nia kontratu.

Diretór Servisu Edukasaun munisípiu Covalima, Francelino Freitas Carvalho, esplika razaun eskola la estende manorin sira-nian kontratu, tanba durante ne’e inan no aman alunu sira maka halo kontribuisaun hodi selu ba kontratadu sira ne’e.

“Bazeia ba sirkulár ne’ebé fo sai husi Ministeriu Edukasaun bandu manorin na’in sira rekolla osan husi inan-aman sira, nune’e Eskola Sekundária Jerál Públiku Suai la estende profesór na’in-36 sira-nian kontratu, entaun manorin na’in ne’ebé maka eskola rekruta liuhusi kontribuisaun inan no aman tenke hapara”, Francelino Carvalho informa iha Santa Rosa, ohin.

Profesór ne’ebé hanorin iha ESJP Suai Sentrál ho nia klase paralela Salele ho Sanfuk hamutuk 89 – permanente 53 no voluntáriu 36 ne’ebé daudaun hapara ona. ESJP iha estudante hamutuk 1.440.

Manorin kontratadu iha eskola sekundária Suai, Albano da Cruz, haktuir katak eskola la etende kontratu ne’ebé remata iha 31 dezembru tinan 2023.

“Eskola la estende ami-nian kontratu, tanba durante ne’e inan no aman maka halo kontribuisaun hodi selu ami. Maski la estende, ami kontinua bá eskola atu hanorin estudante sira hodi hein vaga ne’ebé Ministériu Edukasaun atu fó sai”, nia hatete.

Albano da Cruz lori dixiplina istória ne’ebé hahú hanorin iha eskola dezde janeiru 2022.

Lembra katak Ministériu Edukasaun emite sirkular rua númeru 369/2023, 12 dezembru husi Diresaun Jerál Edukasaun no Ensinu no númeru 262/2023, 14 dezembru husi Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál.

Sirkulár Diresaun Jerál Edukasaun hatete dirijente eskola, funsionáriu ka manorin labele rekolla osan husi família alunu sira iha tempu matríkula no husi sekretáriu Estadu husu ba eskola sira labele ezije pagamentu osan ba kualkér razaun hanesan propina, farda no materiál ba estudante foun sira.

Notísia relevante: Eskola públika 15 viola regra matríkula foun

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!