Restu mortál kuaze rihun-10 iha ossoáriu munisipál seidauk haloot
DILI, 10 janeiru 2024 (TATOLI)–Sekretáriu Estadu Veteranu (SEV), Cesar da Silva “Merak”, hateten restu mortál kuaze rihun-10 iha ossoáriu munisipál seidauk haloot.
Notísia Relevante: 2024, Governu planea haloot restu mortál iha munisípiu tolu
“Restu mortál iha ossuáriu territóriu nasionál kuaze rihun 10. Entaun ita presiza haree no prepara mak foin bele haloot tanba atividade no planu MACLN mós barak. Ita halo fazeadamentu la’ós halo dala ida iha tinan ida, tanba ita iha programa no planu seluk ne’ebé prioridade mós atu halo,” Merak hateten ba Agência Tatoli iha nia kna’ar fatin, Caicoli, tersa ne’e.
Tanba ne’e, MACLN hamutuk SEV ho Konsellu Kombatente Libertasaun Nasionál (CCLN-sigla portugés), planu estabelese jardin erói hodi haloot no mate iha kada munisípiu ka haloot iha ida-idak nia fatin, maibé restu mortálhirak ne’e mak lori hotu mai Jardim dos Heroi Metinaro ne’e sei nakonu lalais.
Nia dehan, konstrusaun jardin erói ne’e sei presiza osan rihun $200 to’o $300.000, tanba ita-nia ossuáriu sira iha munisipál ne’e restu mortál sei barak.
“Ha’u fó ezemplu de’it, hanesan ami-nia Munisípiu Liquiça iha 40-resin, Natarbora besik 2.000, Ainaro mós 2.000 no iha munisípiu mós sei iha,” nia dehan.
Jardin dos Heroi. Tuir mia, foin mak estabelese lima hanesan Metinaro, Liquiça, Manufahi, Aileu no Baucau, no iha Baucau ne’e konstrui iha postu administrativu Quelicai no Laga.
“Ita mós identifika ona fatin ba konstrusaun Jardin erói Manatuto nian mak iha Natarbora, Bobonaro identifika ona iha Maliana no Covalima. Atu konstrui jardin erói ne’e ami tenke identifika no kritériu ida mak kada munisípiu iha erói maizumenus 100 ba leten mak foin bele estabelese, se menus hosi ne’e sei labele,” nia dehan.
Notísia Relevante: Governu kontinua halo konstrusaun ba jardin dos herois
Jornalista : Osória Marques
Editór : Cancio Ximenes
