EKONOMIA, MUNISÍPIU, VIQUEQUE

SERVE, I.P sukursál Viqueque menus pesoál halo atendimentu públiku

SERVE, I.P sukursál Viqueque menus pesoál halo atendimentu públiku

Koordenadora SERVE, I.P Viqueque, Cesaltina da Conceição Soares. Imajen Tatoli/Vitorino Lopes da Costa

VIQUEQUE, 10 janeiru  2024  (TATOLI)—Servisu Rejistu no Verifikasaun Emprezariál, Institutu Públiku (SERVE, I.P) sukursál Viqueque daudaun ne’e menus pesoál halo atendimentu públiku.

“Daudaun ne’e hela ami na’in-tolu maka fó atendimentu ba kliente negosiante sira-ne’ebé loke atividade negósiu. Kada loron bainhira kliente sira mai barak, difísil ba ami hodi halo atendimentu lisensa komersiál, kompara ho tinan kotuk, iha funsionál hamutuk na’in-12, depois Governu hasai karta sirkulár ida katak funsionáriu sira-ne’e kontratu hotu iha loron 31 dezembru 2023, nune’e funsionáriu na’in-sia maka agora la tama serbisu,” Koordenadora SERVE, I.P Viqueque, Cesaltina da Conceição Soares, informa ba Agência Tatoli, iha ninia knaar fatin, Beloi, kuarta ne’e.

Funsionáriu ne’ebé daudaun ativa halo atendimentu iha Viqueque kompostu hosi koordenadór, atendimentu públiku no jestaun arkivu .

“Sai hanesan dezafiu boot tanba munisípiu Viqueque iha postu administrativu lima maka halo rejista negósiu hanesan loke  kioske, kompañia, aumenta atividade no halo renovasaun. Ho ida-ne’e ami sente difikuldade tebes, liu-liu ba negosiante sira tanba desizasaun kontratu ba funsionáriu ne’e hosi ita-nia na’i ulun sira, ne’ebé desizaun ne’e ami simu,” nia akresenta.

Notísia relevante : SERVE Viqueque rekolla taxa $640 iha marsu

Tuir estatutu, funsionáriu ne’ebé serbisu iha SERVE, I.P hanesan ajente administrasaun ho ninia kontratu sei moris to’o tinan 2027, maibé notifikasaun ne’ebé fó sai katak funsionáriu hotu nia kontratu hotu iha loron 31 dezembru.

“Ami-nia maluk na’in-sia agora la tama, ami na’in-tolu maka kontinua halo atendimentu atu nune’e atendimentu iha balkaun la’o nafatin. Maski desizaun tun ona no ami-nia kontratu hotu maibé ami hakarak kontinua halo atendimentu tanba nu’udar timor-oan, ita tenke ajuda ita-nia maluk seluk ne’ebé iha vida negósiu tanba SERVE sai hanesan janela úniku ba negosiante sira,” nia  tenik.

SERVE, I.P munisípiu Viqueque iha janeiru 2024 hahú rejista ona kompañia foun haat, renovasaun lisensa komersiál neen no aumenta atividade lima, nune’e totál atendimentu hamutuk 15.

Aleinde ne’e, SERVE, I.P Viqueque hahú fulan-janeiru to’o dezembru 2023 konsege rekolla reseita hamutuk $12.471, ne’ebé mai hosi rejistu foun, altersaun no renovasaun.

Jornalista     : Vitorino Lopes da Costa

Editora          :  Julia Chatarina

iklan
iklan

Leave a Reply

iklan
error: Content is protected !!