Deputadu Manuel Noronha sai Xefe bankada PD hodi substitui Kalohan
DILI, 11 janeiru 2024 (TATOLI)—Deputadu Manuel Noronha eleitu sai Xefe Bankada hodi substitui António da Conceicão “Kalohan” no Armando Lopes nu’udar Vise Bankada Partidu Demokrátiku (PD) iha Parlamentu Nasionál (PN).
Notísia Relevante: Rozenha Martins substitui Deputadu António da Conceição “Kalohan”
“Ami horisehk lorokraik, deputadu na’in-neen (6) bankada Partidu Demokrátiku, demokratikamente ami halo eleisaun hili Deputadu Manuel Noronha nu’udar Xefe Bankada no Armando Lopes Vise Bankada,” Deputada PD, Maria Teresa Gusmão, hateten ba jornalista sira iha uma fukun PN, kinta ne’e.
Prosesu eleisaun ne’e iha pakote rua kompostu hosi Pkote A mak Deputadu Manuel Noronha ho Armando Lopes no Pakote B mak Deputadu Armando ho Deputada Bernardina, maibé rezultadu liuhosi eleisaun sekreta rezultadu ba Pakote A ne’e a-favór haat (4) no Pakote B iha votu rua (2) de’it.
Entretantu, biban ne’e Deputadu bankada PD hili mós Deputada na’in-rua (2) Rozinha Fátima de Oliveira Martins ho Sancha Margarida Tilman, asume fali responsabilidade iha konsellu administrasaun Parlamentu Nasionál.
Eleisaun Xefe bankada foun ne’e hodi subtitui fali Xefe bankada antes ne’e Deputadu António da Conceição ‘Kalohan’ tanba hetan nomeasaun hosi Prezidente Repúblika (PR) hodi asume kargu Embaixadór Timor-Leste ba Indonézia.
Jornalista : Nelson de Sousa
Editór : Cancio Ximenes
