DILI, 11 janeiru 2024 (TATOLI) – Eskola Bázika Sentrál (EBC) Farol devolve osan matríkula hamutuk $21.992 ba inan no aman estudante 1.491 tanba Ministériu Edukasaun la autoriza eskola públika sira atu halo kualkér kobransa.
“Osan matríkula ne’ebé ita devolve fali ba inan no aman sira ne’e iha faze rua. Matríkula ba estudante primeiru anu ho sétimu anu sira ita deside $20 tanba sira foun. Ba estudante tuan sira ita deside $14”, Diretora EBC Farol, Filomena Freitas, hatete.
Dirijente eskola ne’e lembra katak matríkula ba estudante foun no tuan ne’e halo iha loron 15-19 dezembru, maibé suspende tiha loron haat tanba hetan intervensaun husi Inspesaun-Jerál Ministériu Edukasaun (ME) nian ne’ebé konsidera katak EBC la obedese ona ba sirkulár ne’ebé hasai. Depois ida ne’e, sira husu hodi kontinua fali matríkula, maibé lahalo kobransa ba inan no aman sira tanba laiha dalan ba ida ne’e.
Tuir nia, EBC Farol rekolla osan sira ne’e ho intensaun atu sosa mobiliáriu eskolár ne’ebé seidauk kompletu hodi tau iha sala aula sira, inklui selu mós profesór voluntáriu sira ne’ebé maka eskola rekruta, nune’e bele kontinua prosesu aprendizajen ba estudante sira no prepara mós uniforme ba estudante sira.
Ho desizaun ne’ebé maka ministériu hasai ona maka ba nesesidade eskola nian inklui ba falta profesór no laiha uniforme ba estudante sira ne’e sei toma responsabilidade husi Ministériu Edukasaun. Nune’e dirijente eskola ne’e fiar katak prosesu aprendizajen ne’ebé sei hahú iha loron 15 janeiru ne’e ministériu mak sei responde difikuldade ne’ebé maka eskola Farol enfrenta.
Diretór Servisu Edukasaun Munisípiu Dili, Carlito da Silva, afirma katak desizaun ne’ebé maka superiór sira hasai ona liuhusi sirkulár Sekretáriu Estadu no Diresaun-Jerál Edukasaun no Ensinu ne’e tenke konsidera.
“Ha’u mai halo enkontru iha eskola Farol ho ninia filiál haat ne’e ho objetivu atu devolve osan ne’ebé maka eskola refere kobra ona husi inan no aman estudante sira liuhusi prosesu matríkula foun”, dehan.
Domingas Maia, reprezentante inan no aman estudante nian hatete sira la tau kestaun ba osan ne’ebé maka sira kontribui ona ba eskola, tanba sira hakarak atu dezenvolve eskola ida ne’e hodi bele garante futuru ida di’ak liu ba sira-nian oan, maibé desizaun ministériu nian hanesan ne’e ona no eskola deside devolve no sira prontu simu.
“Ami la tau kestaun ba valór osan dólar 14 to’o 20 ne’ebé kontribui, tanba ami hakarak di’ak ba ami-nian oan sira. Ami fiar katak desizaun ministériu nian hodi haruka eskola devolve ami-nian osan ne’e mós di’ak, maibé ami hakarak atu haree netik mudansa ruma iha eskola Farol ne’e ba oin”, nia espera.
Notísia relevante: EBC Fatumeta entrega fali osan matríkula foun ba família estudante
Jornalista: Tomé Amado
Editora: Maria Auxiliadora
