DILI, 11 janeiru 2024 (TATOLI)—Ministériu Obra Públika (MOP) sei koopera ho Ministru Turizmu Ambiente (MTA) halo kontrola ema ne’ebé kontinua ke’e rai iha foho lolon sira, nune’e labele hamosu sedimentasaun iha tempu udan.
Ministru Obra Públika, Samuel Marçal, hateten, inundasaun ne’ebé kontinua akontese iha kapitál Dili la’ós tanba drainajen mak ladi’ak maibé seidauk iha kontrolu di’ak ba komunidade ne’ebé halo uma iha foho leten no ke’e rai inklui konsiénsia ema-nian menus soe lixu arbiru, entaun tempu udan bee lori rai-ten sira tun nakonu iha valeta to’o udan-boot akontese inundasaun.
“Inundasaun mosu dalan alternativa mak emerjénsia ne’ebé ita halo normaliza bee-dalan no hamoos filafali valeta sira temporáriamente, maibé ida-ne’e de’it sei la rezolve problema inundasaun, nune’e ita sei ko’alia ho ambiente atu ba oin evita komunidade labele ke’e beibeik rai iha foho leten sira,” Ministru informa ba Agência Tatoli, iha ninia knaar fatin, Caicoli, kinta ne’e.
Tuir MOP nia observasaun, inundasaun ne’ebé akontese durante ne’e tanba sedimetasaun, ke’e rai halo uma iha foho lolon inklui soe lixu arbiru.
Notísia relevante : MOP hasai sedimentasaun iha mota no estrada risku ba inundasaun
Maski nune’e, Governu la halo mudansa ba drainajen tanba inundasaun ne’e la’ós tanba ho drainajen maibé tanba sedimentasaun ne’ebé maihosi foho leten mak barak liu no tama valeta halo nakonu nune’e hamosu inundasaun.
“Ita problema ho sedimentasaun ida ne’e mak kauza inundasaun, maibé ita nafatin halo esforsu normaliza bee dalan no hasai sedimentasaun iha kapitál Dili, desde akontese udan-boot to’o agora,” nia tenik.
Jornalista : Arminda Fonseca
Editora : Julia Chatarina
